روائي قصير

في زحمة مرجان وكركر وشيمور وفتيقة ....زتحب أحيانا أن تشاهد نوعا مختلف.....مختلف في كل شئ.....في زمن العرض.....ومكان العرض......في طريقة الحوار والتصوير والموسيقى ...كل شئ
الأفلام الروائية القصيرة ممتعة بالنسبالي....... حاجة أصعب من التفتيش عن كنز علي بابا إنك تدور على فيلم روائي ع النت.....الاختيار التاني إنك تكون ساكن جمب الزمالك عشان تتابع عروض الأفلام دي ف ساقية الصاوي!!!!!!!!!؟!!؟
المهم من وقت لوقت ....وأحيانًا الفاصل بين الوقتين بيكون كبير بس مش مهم........ بتفرج على فيلم روائي قصير...... النهاردة اتفرجت على اتجاه المرج.....بًمضاء كريم الشناوي.....مشروع تخرج من كلية الإعلام .....حكاية بصوت شاب مصري كأشبه ما يكون بتدوين مذكرات عن المترو أثناء ركوبه ف المترو.....مستقلا إياه ف اتجاه الجامعة الأمريكية .... ف محطة.يووووه الزهايمر اشتغل معنتش فاكرة اسم المحطة اللي نزل فيها.....المهم مرورا بعبد الناصر وحسني مبارك وكوبري القبه يحكي تفاصيل تراها ولا تراها أثناء ركوب المترو.الذي أعتبره شخصيا من أجمل الأماكن بالنسبة لي ف القاهرة.....يحكي عن الحواجز التي تفرقنا.والنقاط التي تجمعنا...عن الإيه يو سي....والمعونة الأمريكية....وهذه هي ميزة الفيلم الروائي....أنت لا تحتاج إلى ساعة ونصف كي تفهم رسالة الفيلم....أنت فقط تحتاج إلى ذهن متفتح.....ز وثمانية عشر دقيقة أو أقل أو أكثر بقليل لا فرق...... في النهاية تجد نفسك وقد انتهى الفيلم وتركك تفكر
المهم إن كنت من محبي السنما القصيرة لن تكون أسماء مثل...أحمد خالد....خالد حماد.....مهند مهنا......هاني حمدي......هديل نظمي.....وأمير رمسيس غريبة عليك....ولن تكون عناوين مثل..... الجنيه الخامس....30 نوفمبر.....أفلا يعقلون......أيضًا غير مألوفة........... لكن المشكلة أحيانًا هو غياب الرقابة على مثل هذه الأفلام تاركة مجال أوسع للكلام الذي لا يقال في مكان آخر........ ربما هو السبب الذي جعل الحصول على مثل هذه الأفلام ومشاهدتها أمرًا صعبًا....لا أتحدث هنا عن وضع المحجبات في صورة سيئة....هذه ترهات .....فالشعب ثلاثة أرباعه محجبات .........يعني ثلاثة أرباعه مبيغلطش؟؟؟؟ مش منطق سيبك من دا.....بس فيه أفكار تانية عن التابوهات الثلاثة الممنوع على أي بني آدم الكلام فيها وتناولها في أي وسيلة إعلامية.غالباً بتلاقي الكلام عنها على ودنو في الأفلام دي......... عشان كده صعب تلاقي فيلم كويس منها مبيتكلمس عن الممنوعات دي خصوصًا إن الأفلام اللي بتاخد جوايز منها هيا الأفلام دي بالات لإنها ف نظر صناع السينما المستقلة تحدت الخطوط الحمراء ووصلت لما وراء الحواجز و..... والكلام الكبير ده

blog!

لماذا دخلت عالم البلوجرز؟؟؟؟؟؟؟؟؟يانهار أبيض ع الكلام الكبير أكني دخلت عالم البحار ولا حاجة.....المهم إيه اللي خلاني أصحى م النوم وأقول: أنا النهاردة هعمل بلوج؟؟؟؟؟؟
الحقيقة فيه أسباب كتير : بحب أكتب وملقتش حتة أكتب فيها يمكن لو كنت ف مصر كنت قدمت ف جريدة الدستور ويمكن كانو قبلوني........ وثانياً بحس أحيانًا إني عايزة أتكلم مع حد عشان كده اخترعت شخصية القارئ العزيز عشان اقوله كل اللي ف نفسي.....حتى لو كان البلوج ما بيقرهاش حد أساسًا......... ويمكن دا اللي خلاني مرضاش أحط عداد الزوار ف المدونة عشان ميجيليش إحباط ولا حاجة من العدد.....على العموم هيا لسه جديدة ....وأنا الهدف الأساسي ليا من الكتابة مكنش إن الناس تقرا اللي بكتبه....لو قروه دا شئ جميل بس لو محدش قرا برضو مش هزعل.. ولو إن كلنا لازم نقرا....يللا نقرا....... يللا كلنا نقرا....طنط يسرا قالت كده
المهم حلو قوي لما تدخل عند حد ف مدونته وتلاقي عنه كتير م الأفكار اللي عندك.....تلاقيه بيحب يسمع منير....تلاقيه مبيحبش الورد ..........تلاقيه جدته أعز الناس على قلبه توفاها الله وهوا دايمًا بيشتاقلها ونفسه تشوف اللي وصله........... تلاقيه بيحب صلاح جاهين ...... وركز ع الأخرانية دي عزيزي القارئ
هوا دا اللي لاقيته ف مدونة : ((((((أنا اللي بالأمر المحال اغتوى..... أميرة حسن))))) الغريب برضو إنها صحفية ف نفس الجريدة المفضلة عندي......... والحلو برضو لما تدخل مدونات ناس استحالة كان ممكن تقابلهم ع الحقيقة بأي حال من الأحوال......تعرف بيفكرو إزاي.......عايشين إزاي....... وأهو فضول مش أكتر
المهم...... كان هذا موجز الأسباب التي دفعتني للكتابة وللتفاصيل راجع صفحة الحوادث؟؟؟!!!!!!!؟

إيه ....هوا بيقول إيه؟؟؟؟؟؟؟؟

كام مرة عدت عليك حاجة سمعتها واكتشفت بعد فترة انك كنت سامعها غلط ........... انا عدى عليا كتير مش اوي بس بعد ما بتكتشف الحقيقة المرة ....بتقعد تضحك للصبح
اكتشفت من فرة قريبة .....إن ف المشاريع الكبيرة الكلمة اللي كانو بيقولوها ف المسلسلات العربي :هنعمل دراسة........ بين النقط أنا كنت بسمعو جدول......واقول ياربي إيه دراسة الجدول دي؟؟؟هوا الجدول فيه إيه عشان يتدرس....دا لازم بقى حاجة صعبة أوي وأرقام وبلاوي......لحد ما اكتشفت الحقيقة المرة إنها جدوى مش جدول مع إن جدول أوقع أفرض المشروع مطلعش منو جدوى نقول إيه بقى الدراسة فشلت؟؟؟؟؟؟؟؟
حاجة تانية برضو ف أغنية الكنج الفنان منير : نعناع الجنينة .....أنا كنت أسمعو بيقول نعناع الجنينة المسجي في حيطانو شجر المسطرح ضلل على عيدانو .....الله ع الفن واقول ياربي إيه شجر المسطرح دا.....أكيد دا نوع شجر بيطلع عندهم ف النوبة..ألذ حاجة إنك تقعد تخرف مع نفسك كده عشان توصل لتفسير حاجة مش موجودة أساسا.......الحمد لله عرفت إن مفيش حاجة اسمها شجر المسطرح وإنو بيقول شجر الموز طرح..عادي يعني
وألذ حاجة بقى لما تكتشف إن مشش انتا بس اللي كنت فاهم غلط ......... لما قريت ع النت موضوع اسمو أغاني كنا بنسمعها غلط............. فيه أغنية لهشام عباس وحميد قديمة قوي اسمها عيني اكتشفت إن مش أنا لوحدي كنت بسمع المقطع ده غلط......رمشك يازنجاري جاب جلبي ف ايديا.بين قوسين جلبي= قلبي بس هيا الاغنية كده.......المهم التفسيرات العبيطة اشتغلت طبعا وبقيت اقول زنجاري دي أكيد يعني اسمر..... اصل الكلمة شبه زنجي كده زنجاري........... المهم هيا طلعت رمشك يازين جادر.بين قوسين جادر=قادر.......... وفيه اغان تانية انا مسمعتهاش بس فيه ناس ظريفة سمعوها.وسمعوها غلط طبعا..ثومة ف مقطع بتقول وابتدى الليل يبقى أطول من سي عبدو............. ههههههههههههههههه أطول من ساعاتووووو كاظم ف مقطع بيقول ..........وقرعة فؤاد على باب صبري..........................لا دي جامدة موووووت .... إيه اللي حيجيب قرعة فؤاد على باب صبري ....ههههههههههه وقرع فؤادي على باب صدري.......... أنغام بتقول سيني وصادي زاد عليا حنيني.........ليه السين والصاد أشرار قوي كده.........هههههههه طبعا سيدى وصالك
في أغنية تانية في فيلم أحمد زكي النمر الأسود......اتقدم اتقدم للشمس للنور مش هلعب ديناصور .................................. دي جامدة برضو.............هههههههههه مش هيعطلنا سور.
حاجة جديدة سمعتها برضو ومكنتش اعرف معناها بس دي جبتها بالتخمين كده والحمد لله ربنا يكرمها اللي قالتلي عليها.....بين قوسين برضو أول حرف من اسمها ألف حتى يذكرها التاريخ بس......... كلمة كنت بشوفها ف النت كتير عربي واجنبي......مش عارف مين يقول مش عارف إيه تبص تلاقي مش عارف مين التاني يقولك لوووووووووووووول ولو بالانجليزي يامرسي يحطها برضو........ المهم انا كنت بقول لول دي اكيد يعني شئ جميل او حاجة حلوة حاجة كده زي حسن اللول......اكتشفت ان لول دي اختصار لجملة انجليزي
Laughing out loud
واحد بيضحك يعني.........والطبيعي ان انتا مش هتضحك إلا لو كانت حاجة حلوة ....يبقى مرحناش بعيد برضو
آخر حاجة عشت حياتي مخدوعة فيها وانا فاكرة إن الطحال هوا هوا البنكرياس.ولإني عارفة وظيفة دا ووظيفة دا.....فكنت أقول أكيد حتة م البنكرياس بتطلع انسولين وحتة تانية بتكسر الكور الحمرا...... فيه دكتورة محترمة تقول الكور الحمرا...يللا ماعلينا........ المهم هما اللي غلطانين ف المدرسة احنا رسمنا الجهاز الهضمي والجهاز التنفسي والأجهزة التانية كلها عمرنا ما رسمنا الطحال ده...... هههههههه لووووووول

جبل الدخان

إن كنت جالسا على مقعد الجلد بجوار الباب .....فلن تسمع شيئاً.......وإن كنت جالساً قرب مكتب الممرضة فلن تسمع شيئاً....... إما في حالة إن كنت واقفاً في الردهة فإنك,......... أيضاً لن تسمع شيئاً
فانت في عيادة طبيب نفسي والحوار الوحيد الذي يدور هنا هو في رؤوس المرضى....... لكنك يمكن أن تراها وهي تدخل،،،، لا يهم ماذا ترتدي....وإن كانت أنيقة"" ولكنها تعلم أن دورها قد اقترب......تحادث الممرضة ثم تنهي حوارها بإيماءة وتجلس......وحين يخرج المريض تدعوها الممرضة لللدخول.......طوال مدة سيرها في الردهة ظلت تفكر...... قيل لها أنه بارع لكن أحدا لم يقل كيف....هل كانت مخطئة حينما قررت المجئ .....هل كان يجب أن...... على كل حال لا وقت لإعادة التفكير هي هنا الآن وهو بانتظارها.....تستأذن ببضع طرقاتثم تدخل ....لم يدعها للجلوس لكنها جلست على كل حال
الشيب على بعض الرؤوس كأنه تاج فضة...وعلى البعض الآخر كأنما دقيق غمست فيه....لقد سمعت أحدهم يقول هكذا مرة ...زهذا الطبيب بالتأكيد ينتمي للفئة الأولى ......لم ينظر إليها كان يقرأشيئاً ما ثم أزال نظارته من على عينيه ونظر إليها.........
- ما المشكلة؟؟؟.................. لم تتوقع أن يكون السؤال هكذا ربما ما اسمك ....كيف الحال .....المهم هو رجل عملي إذن حسناً
- أريد أن أنتحر!!!!؟ - وما الذي يمنعك؟؟؟؟
فغرت فاها من الدهشة لم تكن هذه هي الإجابة التي تنتظرها على الإطلاق طبيب هو أم جزار؟؟؟؟؟ ما الذي يمنعنى كيف يقول لي هذا .....زولأن وجهها آخذ بالاحمرار استطرد هو:
- من يريد الانتحار فإنه يقدم على ما يفعل دون استشارة ...هذا ليس زواجاً لتأخذ فيه رأي أخيك الأكبر.....إن كنت حقاً تريدين الانتحار لفعلت .....في الحقيقة أنه توجد مشكلة ولكنك لا تملكين مواجهتها....قولي لي هل فكرت كيف تريدين اأن تفعلي ذلك؟
الانتحار يقصد .....حسنًا هي لم تفكر على الأرجح قبلا في الطريقة .....الكيفية لاتهم لكنها أجابت بعدم اكتراث
- الحبوب أعتقد
- هادئ وسريع إذن ........ لا تريدين إثارة جلبة أو ضوضاء بانتحارك هذا ....ولا إراقة دماء ولا حبال .مفهوم مفهوم.....هناك إحساس منك بالذنب إذن تجاه المجتمع تشعرين أنك عبء عليه في حياتك فلا ترديدن فعل هذا بمماتك........ هل أصبت؟؟؟؟؟
قالو إنه بارع.لكن أحداً لم يقل أنه منجم....كيف عرف كل هذا .حسناً إنه يعرف أكثر من اللازم وعلى الأرجح ستكون هذه مشكلة معها .....فهي لم تعتد أن يفهمها الآخرون بهذه السرعة،ماذا تخبره ...هي لا تريد أن تحكي القصة كلها ....لا تحب الحديث مطولا عن الذات ألا يوجد طريقة لتجنب هذا ...ألا يمكن أن يمارس هو ما يمارسه أيٌا كان ذلك الشئ ليعرف ما القضية لكنها ذهلت أكثر عندما قال:
- اسمعي....أنا لا يهمنى الخوض في التفاصيل لن أسألك لماا تريدين الانتحار أو ما السباب إلا إن أردت أن أسمعك بالطبع فأنا موجود.....لكن يهمني أن أعرف في كلمة واحد فقط مشكلتك الحقيقية كما قلت لك الانتحار ليس مشكلة .....ززجاجة من الصيدليه وكأس ماء حلها .....ماهي المشكلة حقاً
- أنا لا وجو د لي.
بعين زائغة ووباكية أيضًا في الغالب ....... وكأنها تكلم لا أحد
- فهمت فهمت...... أخبريني كيف تشربين القهوة؟؟؟؟
أخذت نفساً عميقًا كأنما أرادت أن تكور قبضتها وتهشم بها قواطعه....... تحدثه هي في حياتها ومشكلتها ويقول لها قهوة ....ومن أتى على ذكر القهوة؟؟؟؟؟ حسنًا إن كان المتكلم مجنون...... فلابد أن تكن أنت أكثر جنونًا ستسايره
- أشربها بدون سكر..........!؟
- أنا أشربها بالسكر........ هل جربت يوما وضع ملعقتين منه في فنجان ؟؟؟؟؟ يالسؤالي بالتأكيد فعلت .....هل وجدت يومًا سكرًا في قاع الفنجان بعد انتهائك؟؟؟؟؟؟
برقت عيناها وهي تنظر إليه .......لقد فهمت لعبته الخبيثة...... على الأرجح هو لم يدر أنها قد درست علم النفس هي الأخرى وتعرف معنى الأسلوب التمثيلي السخيف الذي يتبعه معها...... لا تنفعها هذه الألاعيب وأنكانت تفعل فلربما جربتها على نفسها.......ولكن هل يمكن أن يعالج أحدهم نفسه بنفسه أن كان المرض مرض النفس........ على الأرجح هو يظنها تريد تفسيرًا لما قال لكنها لم تفعل وقبل أن يكمل:
- أفهمك..... ليس معنى أنك لاتراه أنه غير موجود....... لكنك تعرفه بالتأثير أنا لا تأثير لي
- من قال إنه بالتأثير... ومن قال أن الفرد يجب أن يكن مؤثرًا وإلا فلا
هذه المرة هي لم تفهم اللعبة......فلم ترد
- أنت على الأرجح تقولين هو يجب ان يقول هذا الكلام فهو طبيب وفي اليوم على الاقل يؤثر في حياة مريض واحد....لكن القصة أن الإنسان خلق ليعبد خالقه...خلق ليعمر هذه الأرض...يقضي الكثيرون منا حياتهم محاولة لاكتشاف طريقة لفعل هذا .......بينما يجدها بالفعل آخرون....... أما أولئك الذين لا يوفقون لإيجادها .....فيتبقى لديهم هدف واحد خلقوا لأجله ...... إن لم يستطيعو فعل شئ ما في حياتهم يتبقى العبادة........أما أن يصاب الفرد بإحباطات لأنه يشعر أنه غير مرئي هذه ترهات ....يبثها في أذنيه الشيطان ليظن انه قد فشل في تحقيق الهدف الوحيد وينسيه الهدف الآخر.لا أدري بالضبط غن كان ما أقوله واضحًا
- والهم الذي يحيط بالرء من كل جانب.......الهم الذي لايزول للأبد؟؟؟؟؟
- اسمعي ......هل يوجد حقًا ما يسمى بالأبد؟؟؟؟؟؟ الأبد هذا مووجود في أذهاننا ....وينتهي بموتنا نحن
هذه مفاجاة هذا ليس علم النفس كما تعرفه هي....... هذه محاضرة في مسجد.....هل يفعل هذا مع مرضى الفصام ياترى؟؟؟؟؟؟ ماذا يحاول أن يقول ......هي حقًا لا تجد نفسها في هذا العلم ......وهو يقول كلامًا صائبًا ....لكن ......لا تدري لم بدأت تشعر بالارتباك ولم تعد هذه الجلسة تعجبها
- لا تتوقعي منى أن أقضي معك ست ساعات نتحاور عن الهدف من خلق الإنسان.ولا حتى عن ماذا يجب أن تفعلي في حياتك.هذه الأخيرة لا يمكن أن يقررها أحدًاسواكِ.......... اسمعيني فقط........ لا تفكري كثيرًا غن كنت تؤدين ما خلقت لأجله على أكمل وجه......... إن كنت غير مرئية بالنسبة للبشر أنت مرئية لخالقهم....... هو يراك وهذا يكفي. يمكنني أن أنومك مغناطيسيًا وأعطيك مضادًا للاكتئاب واراك بعد أسبوع .عندها قد تعودين وقد لا تفعلي ....تأكدي أن هذا أفضل
صمتت ....قالو أنه بارع ....فإذ بها تكتشف أنه كذلك وهي لا تحبذ رفقة أولئك الأشخاص الذن يشعرونها بالإحباط من فرط نبوغهم.......لكنه لم يقل سحرًا .....لقد قال الحقيقة فقط..هي فقط كانت بحاجة لسماع الحقيقة
هزت كتفيها غير مستوعبة تماما:
- ماذاي مكن أن أفعل الآن بالتحديد؟
نظر إليها بخبث وهو يقول: - لا ادري قولي لي انت....ماذا ستفعلين الآن
أدارت عينيها في جنبات الغرفة وهي تهم بالرحيل وانصرف فكرها بعيدًا ثم عاد لتقول:
- أنا أيضًا لا أدري........... بعد. ولكن بالتأكيد لن أذهب إلى الصيدليه!!!!!؟

انا....من أنا؟؟؟؟

الشعر هو ذلك الفن الذي يعطي الروح للكلمات........لا أعلم على وجه التحديد متى بدأت أكتبه...ولا أعلم أيضا على وجه التحديد إن كنت فعلا أكتبه أو إن كان ما أكتبه هو حقا شعر...لكني بالتأكيد أحبه ..الشعر الحر....الأسطر القصيرة المصفوفة فوق بعضها لتحكي قصة..أو فكرة...أو شئ ما.
يقولون أن أول من كتبته كانت نازك الملائكة وهاجمها الكثير لأنها عبثت بموازين الشعر وقوافيه.......أنا لا دخل لي بكل هذا الهراء سوى أني أحب شعرها ........... وأحب بالذات .......... من أنا؟؟؟؟؟؟؟؟
الليلُ يسألُ من أنا
أنا سرُّهُ القلقُ العميقُ الأسودُ
أنا صمتُهُ المتمرِّدُ
قنّعتُ كنهي بالسكونْ
ولفقتُ قلبي بالظنونْ
وبقيتُ ساهمةً هنا
أرنو وتسألني القرونْ
أنا من أكون?
والريحُ تسأل من أنا
أنا روحُها الحيران أنكرني الزمانْ
أنا مثلها في لا مكان
نبقى نسيرُ ولا انتهاءْ
نبقى نمرُّ ولا بقاءْ
فإذا بلغنا المُنْحَنى
ِفإذا فضاءْ!
خلناهُ خاتمةَ الشقاءْ
والذاتُ تسألُ من أنا
أنا مثلها حيرَى أحدّقُ في ظلام
لا شيءَ يمنحُني السلامْ
أبقى أسائلُ والجوابْ
سيظَل يحجُبُه سراب
وأظلّ أحسبُهُ دنا
فإذا وصلتُ إليه ذابْ
وخبا وغابْ
هذا هو ما أسميه شعرا حر..... وهذا هو ما احب أن أقرؤه بل قل ما أحب أن أعيشه!!!!!!!؟؟؟

بدون عنوان!!!!!!!!!!!!!؟

العلاقات الإنسانية هذه الأيام أصبحت كالزئبق............لكل شئ اسماً مختلفا........ .لكل المشاعر طريقة لإخفائها..........لكل الغايات وسائل تبررها.لا يمكنك إمساك الحقيقة منها بمكان.........لا يمكنك أن تدرك حقاً حقيقة من هو أمامك....ثعلب .........ذئب ............. حمل وديع ... أنت تعلم أنه لا يقول الحقيقة.....كما لا يمكنك أن تنعته بالكاذب ....إنه شئ أشبه بالتفاف ألف شخص على شخص واحد لقتله عندها لن يعرف القاضي حقا من يزج في السجن ومن يطلق........... أمر بين الأبيض والأسود لكنه ليس رماديا ......أمر لا يمكنكك حقا استيعابه...........
لماذا يفكر الناس بأشياء ليست مناسبة في أوقات ليست مناسبة ....لماذا أصبحت المفاهيم ........لنقل أنها لم تعد موجودة....أو أنه يعاد وضعها من جديد
اختلط كل شئ..وتغير كل شئ.أم أن شيئاً لم يختلف قط...... وأن كل مافي الأمر أننا أصبحنا مخلفات حضارة انقرضت منذ زمن.حضارة كانت تؤمن بالصدق.تؤمن بعدم وجود المثاليات ...ومع ذلك تطالب بحد أدنى منها
على كل حال...البشر كائنات غريبة .تقضي عمرك كله حتى تفهمهم ..وعدما تفعل –هذا إن فعلت- تكتشف أنك لم تعد تفهم نفسك!!!!!!!!!!؟
لا ادري ........ ماذا أقول؟؟؟؟؟؟؟؟؟

أيام زمان

في عائلتنا يوجد حب غريب لللاحتفاظ بالاشياء القديمة.....والغريب ان كلا والدي هكذا........قد تجد لدينا أشياء غريبة لا تفهم حتى ماهي.......إلا أنك تعلم وتدرك تماما أنها ماهي إلا أشياء قديمة.
الذكريات حاجة حلوة بالذات لو احتفظت بحاجة تفكرك بريحة زمان.........وأيام زمان........ الصور ......اللعب ............كراريس المدرسة القديمة..الهدوم الصغيرة اللي كنت بتلبسها وانتا ف ابتدائي.............كل دي حاجات أول ماتشوفها تبقى حاجة من اتنين ياتضحك .ياتعيط ....على حسب نوع الذكريات المرتبطة بيها!!!!!!!!!!!!؟مع إنها حاجة تشل ف نفس الوقت لإنها بتاخد حيز من الفراغ ملوش لازمة.
لكن أحيانا بتقعد تفتكر وتحن..تحن لحجات كده فات عليها سنين ...... تفتكر ناس ممكن ميكونوش معاك دلوقتي......تقعد تسال نفسك ياترى لو كانو موجودين ف الموقف الفلاني كان إيه اللي هيحصل .غالبا زمان مكنتش بهتم بحديث الذكريات الفارغ دا...........بس احيانا بيبقى الواحد كده يعمل زي العيال الصغيرة ويقعد يقلب ف اللي فات.....على سيرة التقليب ف اللي فات دي حاجة انا مبطيقهاش اصلا لانها بتجيب مشاكل .بس دا تقليب ف اللي فات من نوع آخر أنا بتكلم عن اللي فات ..واللي مات.....إيه الغم دا ..قلبناها دراما وأوتار الليل
المهم ما علينا من دا كلو .....بيقولو من فات قديمه تاه.مع إني مبعتقدش أوي بالأمثال دي .بس فعلا مهم أوي الواحد يفضل فاكر حجات معينة كده حصلت له عشان الغلط منها ميكرروش.والحلو مينسهوش.والله يرحمك يا جدتي

طلي بالأبيض طلي .....يازهرة نيساااااااااان

مساء جديد...أو قل بالأحرى صباح فأنا لا أكتب كالعادة إلا وش الفجر..... أنقطع عن الكتابة في العطلات لأني لا أجد ما أكتبه ....لا شئ جديد يحدث ننام لنصحو ونصحو ...إلخ.
البارحة..-الله يمسيكي بالخير ياللي ف بالي- ههههه- المهم البارحة كان أهلي معزومين على فرح
فرح بنت بنت ابن عم أبو ماما ولأن صلة القرابة لوحدها تاخدخ نص سطر فسنتجاوزها...المهم هي وحدة من أولئك الأشخاص الذين تسمع أنهم أقاربك ولا تراهم طوال حياتك إلا في فرح أو عزاء.
المهم أنني لم أذهب ...باختصار شديد لأني لا أحب الأفراح.... ولا أجد أي متعة في الجلوس على كرسي لمدة ساعتين والناس تبص عليك!!!!!!!؟
ولا أن يلتف حفنة من الرجال حول العريس ويدوها عشرة بلدي ....وتقوم العروسة لأخذ نصيبها ختى لو إدت سبعة ونص مش عشرة يعني.....الاحتفال والفرح شئ جميل ومبهج ....لكن الطريقة نفسها التي أصبحت مملة ورتيبة ....كل الأفراح نفس النظام ....زفة...... والعروسة ماشية بسرعة اتنين سم ف الدقيقة ...والعريس مخنوق غالبا م الكرافتة أو من حماتو الله أعلم....والرقصة الأولى اللي غالبا بتبقى على أغنية لعمرو.......ومتفهمش بيبقو يوشوشو بعض يقولو إيه وهما بيرقصو ........ييجي بعد كده أي هلس لغاية ماينزل البوفيه واتكلو على الله ....هوا ده الفرح ....فين المتعة ف كده بقى....ناهيك عن ذكر الدي جي اللي غالبا بتخرج منه بعاهة مستديمة
عشان كده انا كل خمس سنين اما احضر فرح وآخر فرح حضرتو كنت مغصوبة والله....أنا شخصيا بأؤيد فكرة إن العروسة توفر الفلوس اللي بتتدفع ف الفرح عشان ليلة ...وتروح بيها مع عريسها مكان حلو يقضو شهر العسل....بمناسبة شهر العسل والأفراح والليالي الملاح عرفت إن شهر العسل دا عادة رومانيه قديمة.....كانو بيقعدو بعد الفرح شــــــهــــر بحالو يأكلو العريس عسل تفاؤلا بالحياة القادمة...... لا أجد ما أقوله عن الرومان وعاداتهم ولكنهم دائما بيتحفونا بأفكار ((مطرقعة)) المهم...ألف مبروك للعروسين ...وبالرفاء ...والبنين.....والبنات...والسكر النبات...والسلااااااااام ختاااااااااااااااام

يابحرو....مالك طويل كده وملولو....ماشي وين بالليل ده

لأنني كنت قد قررت بيني وبين نفسي انني لن أكتب حتى تظهر النتيجة لظروف ما.....ولكني قد يئست من أني سأتمكن من رؤيتها وأنا على قيد الحياة فتركت هذه المهمة للورثة ....يبقو يشوفوها هما براحتهم.
المهم.....وجدتها فرصة بعد أن عرفنا النتيجة المبدئية عن طريق الانترنت والتي ظهرت-برضو ف يوم مميز تمانية تمانية سبعة- طيب بعد النتيجة ماظهرت والحمد لله اللي نجح نجح مش فيه اختراع اسمو هدايا...... أكيد طبعا ...في ناس مأملة نفسها ف عزومة من العشرة الأوائل –واللي الحمد لله مطلعناش منهم نياهاهاهاهاها- بس أنا شخصيا مليش ف حواديت الأكل والشرب دي أصلا ....أنا عايزة أخرج ....نفسي أسافر مرسى علم....وياويله الذي سيسأل اشمعنى مرسى علم.....مش مهم يعني مرسى علم ممكن شرم مش هقول لأ ......بس حقيقي نفسي أشوف البحر.....نفسي اشوف مسطح مائي غير عذب.........و
رغم أني لم أكن يوما من هواة البحر...ولم يستهوني أبدا لا بمائه ولا بصخبه....ولم أر فيه ما رآه الشعراء ولا الرسامون ولا النجارين حتى.....كان بالنسبة لي – وما زال- مسطح مائي ....هكذا وفقط
ربما يرجع السبب لإني-لما كان عندي كده ييجي ست سنين- كدت أغرق ذات مرة في مياه قناة السويس ولا أذكر كيف .....ولا أرى ذللك الآن أمرا مأساويا ....ولكن ربما عقلي الباطن يراه كذلك........ماعلينا ..... المهم إني نفسي أشوف البحر ....وأسمع صوته وأكتر حاجة بحبها وبتوحشني ....ريحته........نفسي أشم ريحته .... رائحة البحر التي لا تضاهيها عندي أفخر العطور الباريسية ...ليس أنني قد شممت أفخرها...ولكني أتوقع ذلك على كل حال
المهم ...كل هذا أحلام فأنا والحمد لله قد نجحت ...وعدينا ف سنة أولى الحمد لله-حتى الآن حيث لم تعلق النتيجة بعد ...للتفاصيل راجع الورثة-لكن هذا لن يعود على بأي فائدة مادية ....لن أذهب لشرم ....ولن أشم رائحة البحر ولكنيبقى الحلم حق لكل مواطن.....الحلم الذي هو ....وصله تعمل

الأمل......وصلة لاتعمل

وأخيرا الحمد لله ....عدت والعود أحمد.....مش عدت لمصر يعني ...
بل عدت لمدونتى الحبيبة....آه وحشتيني أيتها المدونة....كنت فين.؟؟؟؟؟ آممممم معلش بقى الحياة والدنيا والمشاغل...آه آه منا عارفة إنى خلصت مزاكرة ومعدتش ورايا حاجة بس اعمل إيه منتى عارفة يامدونتى أنا نكدية ومش هعرف اتبسط بالأجازة دي إلا لما النتيجة تطلع ...يللا ماعلينا المسامح كريم ...المهم إني رجعت
رجعت ومعايا خبر البدء بنشاط جمعية جديدة ...غير تابعة للأمم المتحدة ولا الهيئات الحكومية بل هي جمعية (توشكى لصناع الحياة) ملحوظة لمدونتى : أنا اللي سميتها كده ...هي رسميا لسه ملهاش اسم غير إنها جمعية صناع الحياة المنشئة من قبل أفراد الفرقة الثانية –إن شاء الله-بكلية الطب جامعة القناة ولا دجاعي لتفسير اسم توشكى جبتو منين
المهم....دعوة لطيفة تسلمها الجميع عبر الإنترنت للمشاركة في أنشطة الجمعية ...والتي على رأسها شنطة رمضان ..وغيرها من الأعمال الخيرية..أنا طبعا لن أشارك ..ولا داعي برضو يامدونتى للإفصاح عن السبب(الله يمسيك بالخير يللي ف بالي) الأهداف نبيلة والأحلام جميلة تشبه تلك الصفحات الوردية التي يرسمها خيال طفل في العاشرة حين تسأله:نفسك تطلع إيه لما تكبر
يقولك: نفسي أطلع دكتور عشان أخفف آلام المرضى...أو نفسي أطلع ظابط عشان أقبض ع المجرمين ...وتصل ذروتها عندما يقول لك:نفسي أطلع جندي عشان أحرر فلسطين ...(غالبا لا هوا بيطلع جندي ولا فلسطين اتحررت!!!)
ما علينا:عندنا ف الوطن العربي(الجمهور)عاطفي ...يعني تقول على فكرة تلاقي مليون واحد اتحمس تيجي للتنفيذ تلاقي وراك نص مليون بعد شهر من المشروع تلاقي ربع مليون واقفين جمبك ...بعد سنة غالبا مش هتلاقي غير خمستاشر واحد معاك معرفش إيه السر ف الظاهرة الغريبة دي...حاجة كده أشبه بلعنة الفراعنة ؟؟؟؟!؟
يعني أنا مش متشائمة ولا نفسي المشروع مينجحش يعلم الله...خالص...بس الحكاية إني مش حاسة إنو هيستمر حتى لو نجح لعدة أسباب أولها وأهمها(إن الحكاية فيها دفع فلوس والناس عندنا مصابة بالبايفوبيا (فوبييا الدفع يعني ) والحاجة التانية حكاية لعنة الفراعنة (قصدي الحكاية اللي قلتها ف الأول دي) أسباب كتير تخليني مقتنعة تماما إنو لو عايز تعمل خير اليومين دول فإن النشاط المنظم لا يجدي نفعا .....عايز تعمل خير ياتشتغل لوحدك ياتشتغل ف السر...غير كده امممم مش عارفة احتمال
المهم أعلنت الجمعية إنهم هيجتمعو ف الأجازة عشان يشوفو (إيه النظام) مش عارفة احتمال بعد كام سنة إن شاء الله أقرا الصفحة دي ف المدونة وانا بتفرج على رئيس الجمعية ف برنامج تسعين دقيقة ولا العاشرة مساء وهما مستضيفينو بيتكلم عن إنجازات الجمعية (ولو إني متوقعة انهما هيستضيفوه ف يوم م الأيام على كل حال) أو ممكن أقراها وانا بقول ياااااااااااه الله يرحم أيام الشقاوة شفتو كان زماااااااان ف يوم م الأيام عندنا ناس بتفكر وبتشتغل ......يااااااعاااالم
والسلاااااااااااام ختاااااااااااااام

هوا...دا عيبو

تعرضت اليوم لموقف محرج....آه كم أكره أن أحكي عن هذه المواقف....هذه الألوان الغريبة التي تعلو وجهك حين يضعك أحدهم في خانة اليك.....وتتمنى لو أن الوقت يعود لتمح ما قلت ...أو مافعلت
كالعادة...أنا بحب الهزار...وديما هزاري يوقعني ف مواقف لا أحسد عليها...وأنا عارفة انو زي المضاد الحيوي كترتو مش كويسة
المهم ....واحد من هذه المواقف حصل النهاردة....هزرت.....فاتهزأت(مش اتهزأت بمعنى الكلمة يعني) بس نقول شدة ودن
في نفس ذات الوقت ...النهاردة كانت محادثة جماعية لطلبة الدفعة...تاني محادثة جماعية أحضرها...الفرق بين الأولى اللي كانت ف أول السنة والتانية ....الكل تقريبا عارف بعضو... الأفكار نفسها تقريبا....مع اختلاف أن زاد شوية كره للكلية ...أو حب عند البعض الآخر....يعني (فهمنا الفولة).....نفس اللي عملناه المرة اللي فاتت ....كل واحد يقول حلمو...كل واحد يسأل التاني سؤال كأنها لعبة (الصراحة والجرأة) .....بغض النظر .... سيبك م اللي اتعمل المهم اللمة.
عقبال المحادثة التالتة...ان شاء الله ....اللي مش هحضرها....كفاية اللي حصلي ف التانية...((هههههه)))
هنهزر تاني.....يوووه طب اعمل ايه؟؟؟؟
كل واحد فيه عيبو ودا عيبى .....مع انو بينفع احيانا ف مواقف بيبقى الواحد مخنوق فيها ... ف كلمة ممكن تلطف الجو بدل ما الواحد يولع
بس برضو يفضل حاجة بتقلل أحيانا من قيمة الواحد...وتحطو ف مواقف صعبة....بس أنا روحي رياضية وكل تجربة بمر بيها بعتبرها درس.......يارب مرة تانية متسحبش من لساني ....يارب متفهمش تاني غلط
والدرس اللي اتعلمتو النهاردة...بلاش الأماكن اللي فيها ناس كتير ميعرفونيش...ميعرفوش طبعي....بلاش آخد راحتى أوي فيها بالكلام....بلاش اهزررررررررر فيها لأن العواقب دايما بتبقى وخيمة

واقتباسا من محمد عطية.....ماحد يقول لبوءي كفاية هزار ....؟!؟؟
والسلاااااااااااااام ختااااااااااااااااام

الفيلسوف قاعد يفكر سيبوه....لا تعملوه سلطان ولاتصلبوه

مازلت أكمل محاولاتي لفك أسرار النفس البشرية.......وأحاول جمع قطع الأحجية معاً
إيه الكلام العبيط اللي أنا بكتبو دا...؟؟!؟!
الحكاية وما فيها إن علم النفس من العلوم التي كنت ومازلت أنظر إليها بانبهار شديد....وأعتقد أن أصعب مهمة في الطب هي مهمة الطبيب النفسي
لأنك في الأمراض الصدرية يأتيك المريض...تتخمه بحفنة من الأسئلة من نوع....بقالك أد إيه بتكح ؟؟؟ تدير الإجابات في رأسك....تقارن بما لديك في قاعدة بياناتك الطبية و......خد هذا الدواء وبالشفا....اللي بعدووووو
خطوات محفوظة يقوم بها كل الأطباء بشكل روتيني يزيد أو ينقص منها حسب الحالة .......أما الطبيب النفسي ....فقد لا يجد إجابات عن كل أسئلته....قد لا يتعاون المريض بإراداته أو لاشعوريا.....وإن حصل على الإجابات قد لا يجد في قاعدة بياناته ما يستطيع أن يقارن به.....أو على الأقل ليس من أول جلسة .......فالنفس البشرية بالفعل لغز وما ينطبق على حالة من قال أنه بالضرورة ينطبق على الأخرى.......هل يستطيع فرويد نفسه أن يجزم أن حالتين من الفصام أو الإكتئاب تظهران نفس الأعراض .....وقد لا ترى علامات المرض واضحة فهو ليس طفحا تراه أو نزلة شعبية تسمع صوتها......فالأعراض هنا قد تكون دفينة يصعب استخراجها......على الأقل هكذا أراه من وجهة نظري....ربما لأني أحب أن افلسف هذه الأمور قليلا وأعطيها أكبر من حجمها
لكني لطالما احترمت وقدرت الطبيب النفسي رغم صورته ف الأفلام والمسلسلات(غالبا بيكون فؤاد خليل بشعره المنكوش أو أي حد تاني شعرو منكوش .....وحركات غريبة وجملته المأثورة.....انتا هتجنني؟؟!؟)
ومع ذلك لم يتسن لي أن التقي شخصيا بطبيب نفسي...(الحمد لله يعني) يمكن ناس دارسة علم نفس –إنما طبيب نفسي فكلا البتة-
على كل حال.......الذي أثار هذا الموضوع في خاطري هو المقولة :( أن نصف سكان الأرض بحاجة لزيارة على الأقل لدى الطبيب النفسي...والنصف الآخر هم من يذهبون بالفعل إليه) المقولة دي أكيد محدش سمعها قبل كده عشان أنا لسة مخترعاها دلوقتي نياهاهاها ..... أمال ليه بقى الناس بتتكهرب لما تسمع سيرتو: يقولك :تروح لدكتور نفسية وعصبية ....ترد عليه:إخرس يا............!!(بين النقط حيوان يمشي على أربع وأول حرف منو كاف) انتى شايفني مجنون ولا بخرف
دا سبب،،،، السبب التاني :كشف الدكتور النفسي غالي مولع نار....وأحيانا بيقبض بالساعة يعني ولا عمرو دياب......وعلاجو غير مشمول ف التأمين في غالب الدول معرفش ف مصر إيه النظام....؟!؟
عموما مشمول مش مشمول.....أنا لسه بحترم وبقدر وبعز علم النفس دا أوي....؟!؟

أتخصص فيه ......نو........ بس برضو بعزه

والسلااااااااااااااام ختااااااااااااااااااام

إدمان!!!؟

من وانا صغيرة كنت مدمنة.......أيون ........مدمنة أفلام ومسلسلات أجنبي..... الحمد لله بدأت أخف بس لسه برضو مش أوي
سمي أي مسلسل أجنبي تختارو....هكون عارفة هوا بيتكلم عن إيه وإيه أحداثو دا إذا مكنتش أساسا بتابعو...؟!؟
الحاجة الغريبة جدااا جدااااااا بقى هوا اني من وقت طوييييييييييييل مش فاكرة قد إيه وانا بحب أتابع المسلسلات الأجنبي اللي بتدور أحداثها ف المشرحة أو بتتكلم عن التحقيق الجنائي(سي إس آي- ونسخة ميامي- ترو كولينج- إي آر – كروسينج جوردان - ........) ليه واشمعنى النووعية دي من المسلسلات .....الظاهر كان قلبي حاسس إن المشرحة والجثث جاية جاية ......مش عارفة أنا كنت مستعجلة على إيه
دا غير المسلسلات الخرافية بتاعت مصاصين الدماء والظواهر المرعبة وملفات إكس وحاجات غريبة كده لدرجة إني ابتديت ف فترة(من زمان برضو أسدأ إن احنا لو حفرنا ف أرض البيت هنلاقي سرداب سري –مع إن احنا كنا ساكنين ف الدور التاني) معلش بقى كان المفروض يكتبو تحذير على هذه المسلسلات (ممنوع المشاهدة لأصحاب القلوب الضعيفة...والعقول الخفيفة)
المهم طلعت هوجة ف فترة وبقى فيه حاجة اسمها (النسخة العربية...بتاعت الحاجات الأجنبية) شملت البرامج والمسلسلات وحتى الأأفلام وطلع مسلسل .........لحظات حرجة
كل الحدوتة الطويلة دي عشان أوصل لمسلسل لحظات حرجة.......آه ....فعلا ....اتفرجت (بلا فخر) على كل الحلقات وخلص المسلسل (الجزء الأول) قبل ما امتحانات الترم التاني تبدأ باسبوع(دبي عندهم دم برضو كتر خيرهم) وبكده أكون تابعت حاجة وتلاتين حلقة ....استفدت منهم إيه بقى.......ولا حاجة.......طب المسلسل كان حلو؟؟؟؟ ......مش أوي يمكن ف آخر حلقاتو.....أمال كنت بتفرج عليه ليه......؟؟؟؟؟ أولا : تسلية....... عشان مااولعش ف نفسي وف الأبر لمب في يوم واحد
ثانيا عشان أبطالو كانو عاجبني......ثالثا عشان فضولي إني أشوف النسخة المعربة لإي آر ....طيب هما عرفو يعربو صح.....لأه طبعا...من كام يوم كنت قريت ع النت نقد للمسلسل إنو كلام فاضي وتقليد أعمى للغرب ومفيهوش أي نوع من المعرفش إيه كده
طيب ...حاجة بسيطة ....سؤال:... هوا احنا أصلا ينفع نقلد المسلسلات الأمريكية......مادام مفيهاش حاجة خارجة إيه المانع ما الأمريكان نفسهم بيقلدو نفسهم ....عد كااااااااام فلم أجنبي عن كائنات غريبة بتهاجم أمريكا.....كام فلم عن ناس مخطوفين ف طيارة أو قطر والبطل بيحاول يقضي ع العصابة اللي خاطفاهم.....كام فلم عن حادثة ف طيارة أو سفينة والناس عاوزة تطلع منها ومش عارفة وآخرها(بوسايدون) .....كلها أفلام لها نفس التيمة منقولة نقل بس باختلاف التفاصيل اللي بيبهرك بقى الإمكانيات فبتنسى إنها قصة مكررة
وبعدين هما ماقالوش إنهم هما اللي اخترعو لحظات حرجة الكل كان بيقول انو نسخة عربية لإي آر... يعني خلاص نتفرج يعني....لحظة.... بيقولك أنو التقليد ساذج.....ساذج إزاي يعني..؟؟ يعني فإي آر بيجيبولك العمليات وهيا بتتنفذ وبتشوفو وهوا بيدخل الأنبوبة الحنجرية وبتشوفو وهوا بيعك جوا بطن المرض يعني حاجات واقعية......طيب ما طبيعي شوف كام ألف بتتحط ف الحلقة عندهم وعندنا مش العك دا كلو محتاج فلوس عشان يظهر حقيقي
طيب نتفرج يعني؟؟؟؟؟ ثواني هوا أنا ليه بكتب ف الموضوع دا أصلا. مع إنو كلو هلس ما يقلدو ولا ميقلدوش أنا مالي أنا؟.....آه عشان أنا بتغاظ من الناس اللي بترفض كل حاجة جديدة وعندها هوااااااااااااااااية إنها تنقد وأنا قلت مليون مرة قبل كده عشان تكون ناجح إشتغل في صمت متعدش تقول إعملو ومتعملوش إشتغل انتا وانتا ساكت...للأسف لسه فيه ناس كتير متبعة المنهج دا تقعد حاطة رجل على رجل وتفضل تقول.....باردون ياإكسلنس بس كان المفروض إنو .......!؟؟ كده يعني وانا مبطيقش الناس دي
طيب ماشي بعد دا كلو نتفرج بقى؟؟؟؟؟؟لأه .......لييييييييييه...؟؟؟؟ عشان فيه حاجة مهمة ......المسلسل معدش بيتعرض أصلا .... :-)
بانتظار الجزء التاني
ملحوظة إلى نفسي: عشان افتكر لما الجزء التاني ييجي ان شاء الله ....أخر حلفات الجزء الأول.....المبنى الجديد وقع......خالد مفقود....عمرو مفقود......خالد اتكلم اخيرا الحمد لله وبشرى بتفكر.....والدكتور ابن اخت جلال دا ساب الشغل
بس خلاص
والسلااااااااااااااااااام ختااااااااااااااااااام

ليييييييييييييييه بس......؟؟!؟

ازاي تحكم على الناس؟؟؟؟؟تحكم عليهم من الانطباع الأول

ولا تسيبها للظروف والأيام وهيا كفيلة إنها تكوِّن حكمك عنهم...؟؟؟!!؟

ليييييييه الناس لما بتبقى مدايقة من بعض مبتقولش دا بصراحة

ليه بتنافق وتغير ف مشاعررها عشان مصالح أو عشان معرفش إيه...؟

ليه لما بتشوف حد وتحس إنك مش مرتاحلو بتفضل حاطط ف دماغك انو سئ وتفسر كل حركة بيعملها وكل كلمة بيقولها على إنها

من أصلو الوحش

ولو كنت مقتنع إنو زي الفل وأبيض من جوا خلاص يبقى هتفسر كل حاجة بيعملها انو من طيبة وحنية قلبو

لييييييييييه الناس بتفسر أحيانا كل حاجة على مزاجها وكل كلمة على حسب ماتريحها

ليه أنا نفسي بفسر أحيانا الحاجات مش زي ماهيا ع الحقيقىة .....واعيش بقى ف الخزعبلات اللي ف دماغي....وبعد كده اتصدم واقعد متأزمة ومكتئبة

ليه كل حاجة بقى فيها كدب .......حتى العنين اللي زمان قالو إن العين دي مراية......الظاهر المراية اتكسرت....والعنينين بقت بتكدب

ولا أنا اللي مش فاهمة الناس .....ولا احنا مش هنعرف نعيش من غير كدب ....ولا إيه الحكاية؟؟؟!؟

عجبي على العجب العجيب العجاب....؟!؟

المفروض إن البلوج دا تدوين مذكرات ....يعني حاجات مهمة بتحصل ف حياة الواحد مش عايز ينساها...ياحلوة ...ياوحشة
الحاجة اللي هكتبها دلوقتي الحمد لله
وحشة

......الهرم استبعد من عجايب الدنيا السبعة......تصويت أجرته إحدى جمعيات المجتمع المدني(مش جهة حكومية يعني) من عام 2000 لاختيار عجائب الدنيا السبعة الجديدة.
المفروض إن كل دولة عندها أثر هيا حاسة انو مهم تدخل ع الموقع بتاع الجمعية دي وتدخل البيانات والناس بقى تصوت
(تسعين مليون واحد صوتو....تسعين مليون) تصوت إيه اللي هيا شايفاه يكون من العجايب وايه اللي مينفعش
الحكاية بقى ابتدت لما السيد أمين المجلس الأعلى للآثار زاهي حواس طلع وقال: لا ياجماعة إحنا مش هنرشح الأهرامات لأن الأهرامات دي أساسا خارج المنافسة ومينفعش ان أنا ادخلها ف منافسة زي دي على أساس أن هيرودوت (واحد إغريقي كده من زمان هوا اللي سمى عجائب الدنيا السبع القديمة) هيرودوت قال الهرم عجيبة وهوا العجيبة الوحيدة اللي لسه موجودة فإذن الهرم (ما معناه يعني مش من مستوى الحاجات التانية عشان يدخل معاهم ف منافسة) وقال : أنا كده بحافظ على كرامة مصر ....لأن التاريخ ميكتبهوش الناس التاريخ يكتبه الفلاسفة والمفكرين.
على أساس إن الهند لما دخلت بتاج محل كده كرامتها اتهزت.ولا على أساس إن الناس اللي صوتت دي جاية من كوكب تاني
الأردن فازت بالتصويت على مدينة البتراء كعجيبة من العجائب السبع وشاركها الصين بالسور العظيم والهند كما سبق ذكرة..... أنا لا أدعي إني مهتمة أساسا بعلم الآثار دا...آخري شوية أسامي معرفش هيا بتاعت مين ....رع وأمنحوتب ورمسيس..(ياحبيبي يارمسيس وحشتني..... الميدان فاضي من غيرك)

لكن أنا ضد فكرة المكابرة.....فيها إيه لما اقول ياناس إيه رأيكو نحط الهرم من العجايب ولا لأ...لو أنا واثق من نفسي ومن عظمة الآثار دي زي مابقول : ولا هيهمني اتخن تخين... بدليل ان الهند والصين دخلو وفازو واحتفظت الهند بمركزها لان تاج محل كان من العجايب وفضل كده
وبعدين أنا ضد كمان أما كل حاجة تحصل يقولك كرامة مصر ..؟!؟!؟ وكأن مصر هيا حتة صحرا ومفيهاش غير شوية جمال والهرم وابو الهول فبقت القضية كرامة مصر؟؟؟!؟!؟
كان ع الأقل المفروض الناس تعرف بحكاية التصويت دي ...الأردن ف تليفزينها الفضائي كانت حاطة لوجو على جمب كده من فترة عشان يفكرو الناس بالتصويت للبترا؟؟؟!؟!؟
ف الآخر الحكاية دي كلها فكرتني بنكتة.... بيقولك (معرفش هوا مين بس بيقولك) انو فيه مؤتمر صحفي لعلماء الآثار فيه علماء مصريين وإيطاليين وفرنساويين فبيتكلمو فالإيطالي قال: إحنا حفرنا تحت برج بيزا ولقينا كابلات تليفون ...ودا يدل على إننا عرفنا التليفونات من متين سنة.....الفرنسي رد عليه وقالو ماحنا حفرنا برضو تحت برج إيفل ولقينا كابلات تليفون ودا دليل على إننا عرفنا التليفونات قبل تلتميت سنة
قام المصري ضحك وقالهم: يااه مخدتش بالي ...تسدأو إن احنا حفرنا تحت الهرم ملقيناش حاجة خالص ودا إن دل على شئ فإنما يدل على إن المصري عرف الموبايلات من سبع تلاف سنة
ههههههههههههه

عادي ....اقتباسا من الأخ محمد هنيدي...المصري طول عمرو معروف بجبروتووووو وبقوتوووووو
والسلاااااااااااااااااااام ختااااااااااااااااااااااام

مغامراتي تحت الأرض

تحت الأرض....وعبر سلم طويل ....كان اجتماعنا الأسبوعي ...كانت الغرفة تحوي اثنا عشرة أو قل ثلاثة عشر شخصا.... تسمعهم أحيانا يتهامسون ...أو يصرخون فتختلط الأصوات كلٌ مصر على مايريد ولا أحد يصل في النهاية إلى نتيجة....وأحيانا أخرى لا تسمع سوى صوت مزعج لمروحة سقف تبعث تيار هواء بارد ليطفئ حرارة النقاش

والأكيد أنهم قد اجتمعو هاهنا إما برغبة منهم أو رغما عنهم المهم أنك تراهم في ذات المكان في ذات الوقت

مجتمعين لما يسمى بالــــ.......كلاس

آه.....معرفش ليه امبارح افتكرت الكلاسات....وخصوصا أول كلاس...أول كلاس اللي كان المواجهة الأولى ليا مع نظام الكليه
مكنتش عارفة أصلا يعني إيه الكلاس دا ولا حتى بيعملو فيه إيه أأنا أعرف إنو كليه يعني مدرج ومحاضرات وسكاشن والذي منو إنما كلاس؟؟؟!؟!؟!؟!؟؟!
المهم....قالولي فيه كلاس ونزلو فنزلت......مع الماشيين هيا دي أضمن طريقةعشان تمشي ف مكان متعرفهوش..إنك تمشي مع الماشيين....المهم سألتني وحدة إنتى ف كلاس كام؟؟؟؟ طبعا أنا كل علامات التعجب والإستغراب على وشي....حاولت أخبيها وأقولها ...معرفش والله.....دخلت أول كلاس قابلني...آه والله دا اللي حصل...دخلت كلاس واحد.....معرفش ليه بس أنا قلت لسه هطلع واسأل والحواديت دي أنا هخش وتكالي على الله.......وجت الميس(قصدي الدكتورة) وكانت المشكلة عن نظام التعليم ف الكليه(جلسة حصيلة يعني) وكانت المفاجأة.....(أناإيه بالظبط اللي جابني هنا؟؟؟!؟!؟
آه المأساة اللي اسمها التنسيق)إزاي يعني مفيش دكاترة بتنزل كتب أمال هنذاكر منين.؟؟؟؟!؟!؟ وإيه النظام الغريب دا وإيه اللي الناس دي بتعملو....كنت حاسة ساعتها زي واحد اتصل بنمرة تليفون وحد طلع زعق ف وشو وقالو النمرة غلط متتصلش هنا تاني ياغبي.....بس وقعدت تتكلم عن النظام وحسناتو وسيئاتو والطلبة يردو عليها وأنا قاعدة .....زي ماكون جاية من كوكب كريبتون ونزلت الأرض غلط
المهم ...دخلت مدام(فيما بعد تبين إن اسمها ف المسلسل مدام منى ودورها سكرتيرة المرحلة) تنادى أسماء الناس واحدواحد واللي يسمع إسمو يرد(كلاس بقى) أيووووون لحظة الصفر(حد فيكو مسمعش إسمو) آه أكتر حاجةبكرهها لما أحس إن كمية ناس كتير كده بتبص عليا......خصوصا إن لا يبدو عليها أوي ملامح الرقة والطيبة وواضح كده إنها هتسمعني ما أكره ....وزي ما بيقول رفعت إسماعيل ف رواياتو .....وبصوت متحشرج.....قلتلها : أنا!؟ قاللتي انتى ف كلاس كام ....طبعا سؤال ذكي جدا وف محلو....مش فاكرة رديت عليها قلتلها إيه.....فضلت تفر ف الورقة اللي معاها لغاية ما وقفت:أهو .....شفتي إسمك أهو ف كلاس تمانية.....اتفضلي على كلاس تمانية.....طبعا أبسط حاجة ممكن تتعمل ف موقف ز يدا أني أخرج ومرجعش الكلية دي تاني....المهم أنا قلتلها خلاص هخلص بس واروح(على أساس أخلص حصيلة ف واحد واحضر مناقشة ف تمانية لإن الاتنين كانو ف يوم واحد) الدكتورة يظهر حست بمدى المعاناة اللي بيت حاسة بيها لمجرد إني أحاول أتنفس أمام هذا القدر الهائل من الإحراج
قالتلها بهدوء: خلاص سيبيها وهيا هتخلص وتروح الكلاس بتعها(ربنا يخليكي يا شيخة ...دا إيه دا إنتى طلعتيلي منين) بس وخلصت فعلا الجلسة محاولة تفادي النظر لأي أحد من أعضاء الكلاس على أساس يعني مفيش حاجة ...ومحصلش أي حاجة اعتبرو نفسكو ف كلاسكم يا جماعة
وخلصت الجلسة واضطريت طبعا أروح الكلاس بتاعي زي ما المدام قالت. خرجت الدكتورة حاولت تكون لطيفة معايا : مع السلامة ياندى هتوحشينا. أوبااااااااااا لأ خالص انتى مش وقت لطافةخالص انتى متعرفيش إيه اللي مستنيني
أنا حصلي كده ف أول كلاس ... القضية دلوقتي ...هبرر للكلاس التاني انا كنت فين إزاي.......كارثة بقى لو كان دكتور وأخدني موضع تريقة.....لمجرد إني دخلت كلاس غلط. طيب أمري لله هروح كلاس......هيا قالت كام...؟؟؟ آه تمانية مش وقت لخبطة تاني خالص
دخلت كلاس تمانية ....كان فيه كرسي فاضي....وانا داخلة (الحمدلله مكنش دكتور كانت دكتورة) إنت ندى؟ أه بدأنا
أيوه. طيب انتى حضرتي الحصيلة ؟؟؟ احمممممم ....... آه ...قالتلي طيب ادخلي
بس كدا ....ياسلااااام الحمد لله أحمدك يارب.......وجت المشكلة .....قصدي ورق المشكلة وكانت أذكر عن وحدة اتسـألت سؤال فجأة فاتخضت وازرقت واصفرت والمطلوب إنك تعرف إيه التغيرات االفسيولوجية الللي حصلت لها(ياااااه موقف سقع.....مش عارفة إيه الناس اللي بتحرج نفسها دي؟؟!؟!؟!؟ ههههه) أنا طبعا كنت قاعدة ف وادي وهما بيتكلمو ف وادي تاني ....فيه ناس كنت حاساهم ...ماشاء الله لاقوة إلا بالله كأنهم جم الكلية دي قبل كده وعارفين هما بيعملو إيه) وناس ياعيني كانت قاعدة ف الركن تقرقض ف ضوافرها ومحرجة وخجلانة خالص(ملحوظة إلى نفسي: ف نهاية الترم تغيرات جذرية حصلت ف الشخصيات)
المهم فاجأة: ندى!!!!!! إيه رأيك بقى ف اللي حصل للبنت دي؟؟؟؟؟ احمممم مين أنا لا ياجماعة انتو غلطانين أرجوكم أعيدو النظر ...السؤال دا من برا المنهج؟؟؟؟يانهار ....... طب اقول ايه دلوقتي ...انا باعز الكلام زي عنيا ...بس الكلام اللي ملوش لازمة أو لما اتكلم مع حد انا وهوا مش قدام معرفش كام واحد وكلهم بيبصولي ؟؟؟!!؟؟ لا لا أنا مدية الموضوع أكبر من حجمو عادي يعني من امتى الإحراج دا ؟؟؟؟ حجمو إيه ووزنو إيه دا أول كلاس والانطباع الأول بيلزق ف الدماغ مبيطلعش بأجدع أستيكة يعني لو طلعت قدامهم هبلة بقول أي حاجة....هفضل طول االترم كده.....والله معنتش فاكرة أنا ساعتها قلت إيه
بس اللي اعرفوان الحمد لله كلهم قالو إني اتكلمت كويس...الحمدلله ...ربنا اللي بيكرم برضو
وبكده انتهت أول جلسة ليا مليئة بالمغامرات الدراماتيكية ...سمعت فيها مصطلحات أول مرة اسمعها ...أول مرة أعرف ان المدرس بيسموهtuter

رئيس الجلسة اسمو (تشيرمان معرفش بتتكتب ازاي ) وحاجات تانية كده ...بس أهم حاجة الحمدلله عدت على خير ...وخرجت بأقل قدرممكن من الخسائر...

.وتبقى الكلاسات.....لغاية سنة ساتة إن شاء الله .....وغصبا عن عنينا ...وصلة تعمل

ما لقيت فرحان ف الدنيا زي..........لا لسه شوية مش هغني دلوقتي

كالعادة لا تحلو لي الكتابة سوى الساعة الثالثة فجرا ....رغم أنها أجازة والمفروض الناس متنامش قبل الساعة ستة الصبح....وزي كل السنة الأجازة مبتبدأش بجد إلا بعد مالنتيجة تطلع ...لكن لأنها نتيجة الكلية ولازم تتأخر مش زي نتيجة المدرسة فقررت أن أنا أبدأ الأجازة بغض النظر عن النتيجة.
ف الواقع مجرد ذكر النتيجة دا بجيبلي حالة كده غريبة معدتش ولا هتعدي عليا ف الطب......زي ما تكون صاحي م النوم ف عز أغسطس والدنيا حرررررررررررر مولعة والرطوبة معرفش أد إيه.....وتلبس هدومك وجزمتك الضيقة أوييييييييييي وصباعك يبقى محشور بيصرخ جواها وتنزل تركب الأتوبيس تيجي تقف جمبك ست تخيييييييييينة معاها ابنها الصغير ويتزنقو فيك ف زحمة الأتوبيس ومتبقاش عارف تاخد نفسك وفجأة يقوم الواد الصغير دايس على صباع رجلك المزنوق ف الجزمة.........شفت بقى
طبعا القارئ العزيز نسي أنا كنت بتكلم عن إيه.....أيون عن إحساسي لما بسمع سيرة النتيجة؟؟؟؟!؟!؟!؟؟!!؟؟
ودا طبعا نتيجة الإمتحانات الجميلة اللي شفناها ف الكلية اللي مكنش فيها حاجة صعبة خالص.....والأسئلة السهلة اللي إجابتها مش طويلة أبدا ومبتاخدش ف السؤال ساعة وشوية عشان تحل ........لإنك أصلا عبقري وداخل مخلص المنهج كله وحافظ المواد صم
دا كليه سهلة خالص أنصح كل الطلبة إنهم يدخلوها
مع إني كنت بقول لأهلي طول عمري.......شوفو لو جبت مية ف المية مش داخلة طب....؟!؟!؟ بس أهو القدر بقى هنعمل إيه لا وف الإسماعلية اللي الداخل فيها .....بيلزق بلزقة أمريكاني .......ولسه فاكرة إحساسي يوم ما نتيجة التنسيق طلعت وعرفت إن تنسيقي ماجابش الزقازيق وإحساسي بقى ساعتها......ـــ مفيش داعي لذكرو كفاية اللي فوق ــــ المهم كان يوووووووم
وأهي أول سنة ف طب خلصت ــ الله أعلم خلصت على إيه نتمنى من الله إنها تكون خلصت على خير ـــ بس أهي خلصت فاضل بس يوم النتيجة ويوم النتيجة دا بتحس بحاجة غريبة ف الجو يوم نتيجة الترم الأول دا عمري ما هنساه ف حياتي ــ يمكن أكتر من يوم الثانوية العامة ــ لأنو كان درامي شوية .... كنا راجعين فالأتوبيس من الوحدة الصحية وسمعنا خير اللهم ما اجعلو خير واحد معانا ف الأتوبيس بيقول بصوت عالي زي الأفلام كده ـــ دايما ف الأفلام تلاقي التليفون رن والبطل رد:ألو ...أيوه ....إيه بتقول إيه؟؟؟؟؟ معرفش ليه الديالوج دا بتكرر كتير مع علامات التعجب على وش البطل ونبرة الهلع في صوته ــــ المهم البطل (قصدي زميلنا دا) رد ع التليفون وقال لزميلو: إيه!!!!!!!!!!! النتيجة طلعت!!!!!!!!!!!!!!!!!!
طبعا إحنا كنا قاعدين ولااااااااااااااااااا همنا...ــــ أصل زميلنا دا دمو خفيف وبتاع مقالب فقلنا أهو أكيد مقلب ياهو عاملو ف صحابو اللي ف الأتوبيس يا صاحبو اللي بيكلمو عاملو فيهـ ـــ المهم فجأة الحكاية قلبت بجد ولقينا موبايلات تانية ف الأتوبيس بترن وحروف غريبة عمالة تتقال: إشي إيه / وسي/ وكيو (لأ كيو دي من عندي ) المهم الكل سدأ والكل اترعب وعيشنا أكتر ربع ساعة مخيفة ف حياتنا وأصبح المشوار لدخول توشكى طويييييييييييلا فجأة ...
المهم ما علينا من كل دا ....دخلنا كلنا ولقينا اللوحة التاريخية متعلقة والكل بقى زي طوابير الجمعية عليها والمنظر إيه؟؟!؟؟!؟الحكاية دي كانت بالظبط قبل يوم تحرير سيناء بيوم (يعني 24-4) ودا اللي مخليني متوقعة نتيجة الترم التاني تظهر قبل يوم الثورة بيوم(سهلة دي يعني يوم22-7)معرفش هوا ممكن يكون يوم جمعة أساسا بس هيا كده هتبقى ظريفة يعني ..........................نتيجة أولى طب تكون مرتبطة بالأحداث التاريخية العظيمة
ما علينا برضو من كل دا..... دا كان ماضي....وإقتباسا من الأخ عمرو دياب....بلاش نتكلم ف الماضي...!؟؟!
ياااااااااااااااااارب يااااااااااااااااااااارب اللهم إني أسألك التوفيق ياااااااااااااااارب إكرمني واكرم كل من تعب وذاكر وسهر يااااااااااااارب ......آمين

أنا مش معاهم!!؟؟ ولا معاكي؟؟؟!؟؟

الذين يعرفوني جيدا يعرفون أني أعارض الكثير من الهتافات التي ينادي بها دعاة تحرير المرأة ......مش إني لا سمح الله بقول الست دي

كائن غريب يجب وضعه في كرتونة ووضعه ف المنزل........لأ خاااااااااااااالص
المعنى :إني أعتقد إن جزء من هذه الشعارات أوصلتنا إلى ما نحن فيه ......ومحدش يقول هوا إحنا مالنا ماحنا آخر فل أهو .....طيب بلغة أسهل ....أعتقد أن هذه الشعارات هي جزء من الأسباب التي دعمت ظهور هيفا وروبي ونانسي....والفيديو كليبات اللي بالي بالك.....والورق العرفي والورق اللي مش عرفي .....يعني حاجة كده
ليييييييييييييه بقى....لأنك لما تخرج شئ عن الإطار اللي اتخلق فيه أكيد حاجة م الاتنين يالشئ دا هيبوظ ومعدش هيبقى صالح للاستخدام ياإما .... مصايب كتير هتحصل
يعني الأصل ف الإنسان الستر لما تقلعه يبقى حاجة مش لطيفة خالص(حرام أساسا ....بس حتى لو أنتا بوذي وماشي ف الشارع شفت واحد عريان او بالاخص وحدة لابسة مش لابسة دا هيجر ويلات هيقود لإنك تبصلها وهيا تبصلك وبعدين الشيطان شاطر....مفهوم طبعا) المهم أنا ضد حجات كتير من شعارات حرية المرأة لإني مقتنعة تماما إنو ....البنت مش زي الولد.....معلش بقى ياسعاد الله يرحمك .... آه ناس كتير لسه مقتنعة إنو البنت ممكن تعمل كل حاجة وتشتغل ف كل حاجة ومش عارف إيه ودي نظرية أثبتت خطئها ع الأقل معايا شخصيا..
لإن الذين يعرفوني جيدا برضو عارفين إني بسافر كتير بحكم الكلية اللي مش ف نفس المدينة بتاعتي وقصة طويلة كده مش مكانها المهم المرة دي بعدت شوية وسافرت برا البلد ....المفاجأة بقى إني ف المطار أول مرة أشوف ست ع الكاونتر بتاع الجوازات
كانت مفاجأة الصراحة إنك تكون بتسافر بقالك حوالي تلاتشر سنة وتشوف المنظر دا لأول مرة... المهم حظي الجميل وقعني ف الطابور اللي هيا بتختملو.....وطبعا ....... لا داعي لذكر العطلة اللي اتعطلناها المادام كانت بتختم جواز وتتكلم مع زميلها اللي ف الكاونتر اللي جنبها كلمة ......وتختم ختم وتتكلم كلمة.....آه القارئ العزيز الذكي هيقولي :أهو طب ما زميلها أهو كمان كان بيتكلم....يعني أهو البنت زي الولد..غلط لأن زميلها دا كان بيتكلم وهوا بيشتغل يعني بقو شغال وإديه شغالة مش زيها مش عارفة تركز غير ف حاجة وحدة ياتتكلم ياتختم.......طبعا فيه ناس كتير بتعترض ع الكلام دا وتقول لأه دي وحدة من ألوف السيدات الناجحات العاملات الموظفات ال.......ماشي أنا شخصيا برضو أعرف ستات بيشتغلو ناجحين جدا ف شغلهم والكل بيشهد بكده والحمد لله ف بيتهم برضو ....يعني شغالة ع الوشين......بس المشكلة إن مش دي القاعدة اللي أنا شايفاه إنها الشاذ من القاعدة
أنا مش بقول إن الست تتكبس وتقعد ف البيت..... أنا بقول إنو في ستات كتير لا يصلجو إلا لطبخ البامية ....ويمكن حتى لا يصلحو لطبخ البامية.....بيعذبوا خلق الله ويشتغلو ليه.؟؟؟؟؟؟!!؟؟؟
آه طبعا أنو لو قلت الكلام دا ف برنامج ع التلفزيون هترمي بال.......(بين النقط شئ نلبسه ف رجلنا وأول حرف منو ج) هترمي بيه لأنو تخلف.....لأنو رجعية.......لأنو هدم لكل الأسس التي قامت عليها مفاهيم المجتمع المتحضر التقدمي البرجوازي البراجماتي....؟؟!؟!؟؟ بس لأه برضو أنا لسة مقتنعة أنو ف حكاية الستات دي في ستات بتشتغل ف أعمال وهيا غير مؤهلة لها ولا كفء لها (احتمال هيا نفسها تكون عارفة كده بس بتكابر) وفيه ستات فعلا بجد يترفع لها القبعة لإنها بتعادل الصورة وتبين إنو فيه دا وفيه دا ...وتخرس الأفواه المتعصبة(أمثالي يعني) التي تطالب بمنع عمل المرأة(هما لو منعو عمل المرأة أنا هقعد ف بيتنا ف الحمد لله إن الستات دول موجودين)
ومعرفش ف الحقيقة العلاج للموضوع دا إيه ......بس مهما كان هيفضل برضو فيه نماذج زي نهى(الموظفة ف المطار اسمها نهى لقطتو من ع الكارت نياهاهاهاها) ويفضل في نماذج مشرفة لستات قدرت تنجح ف بيتها وشغلها زي ناس كتير أعرفهم......وأكيد ناس أكتر معرفهمش...... فبارك الله في النوع التاني........وربنا يرحمنا من الأولاني؟؟!!؟؟

والسلااااااااااااااااااام ختاااااااااااااااااااااام

57357

النهاردة سبعة ....سبعة .....ألفين وسبعة......!؟؟؟
السبعات الكتير اللي ف التاريخ متهمنيش بحاجة مع اني بحب رقم سبعة جداااااااا
الحدث النهاردة اللي ممكنلا يعني أي شئ لأن أحد افتتاح مستشفى سرطان الأطفال
معرفش ليه المستشفى دا له صدى خاص عندي......يمكن عشان واحدمن أطفال العيلة اللي بموت فيهم أصيب بالسرطان وهوا صغير جدا..فانا عارفة كويس يعني ايه تشوف طفل مريض بالسرطان...أو يمكن لأن الأطفال عموما لهم تأثير خاص عليا.........وبحس أحيانا إن الأطفال اللي بييجو ف الإعلان دول كأني أعرفهم
المهم ....المستشفى دا انا متابعه الإعلانات بتاعتو من أيااااااااااام ......اشترينا الأرض اتبرعو للبناء......ابتدينا البنا اتبرعو عشان نكمل....المبنى خلص وفاضل المعدات.تعاطفك لوحد مش كفاية....الافتتاح سبعة سبعة ايديكو ف إدينا
ومعرفش ليه كنت بتنح وأنا بتفرج ع الإعلان،كنت مسدآه أوي,,,,وكنت حابة المستشفى دا أوي,,,,,,,,,,لدرجة إني مرة حلمت إني رحتو رحلة واتفرجت عليه من جوا وكنت مبسوطة أوي ف الحلم.............!!!؟ (مستشفى السرطان.....مكونتي إحلمي بترب الغفير أحسن!!!!؟؟؟)؟ مش كده بس فعلا أنا بحب المستشفى دا ....ليه....معرفش
مع إني عادة مش متفائلة خالص.....إلا إن المشروع دا معرفش أنا ليه مسدآه أوي......ومتفائلة بيه أوي
رغم الشكوك الكتير اللي دايما بتتنسج حوالين أموال التبرعات اللي بتتجمع لأي مشروع خيري،وحقيقة وصولها،،،،لكن مش مهم المهم إنهم وصلو الحمد لله

كل حاجة فيه مختلفة ...يمكن لو يوم الافتتاح عملو زيطة وجابو تامر حسني ولا حماقي وحفلة بقى وبتاع كنت قلت أهو مشروع آخر ينضم لقائمة المشروعات الفاشلة لكن لأ الافتتاح كان بهدوء ..........كالعادة منى الشاذلي فاهماني وحضرو بكاميراتهم أول يوم افتتاح

،،أنا حتى ذاكرتي سيئة لحد القرف ف حكاية حفظ الأرقام بس مع المستشفى دا أنا كنت حافظة بيانات كتير عنو
مساحة المستشفى اللي هيا 69 ألف كيلو مربع والسعة بتاعتو اللي هيا 180 مريض داخلي و60 خارجي والتكلفة اللي اتبنى بيها 300مليون جنيه ياااااااااااااااااااااه
الظاهر يابلد إن الخير فيكي .......لسه وصلة تعمل..!؟

مللللللللللللللللللل

بسم الله الرحمن الرحيم

ف يوم من ذات الأيام اللي هوا النهاردة والساعة تقريبا داخلة على تلاتة الصبح وبعد أن كنت قد انتهيت من قراءة إحدى معشوقاتي (رويات ما وراء الطبيعة) خلصت الرواية كلها في يوم واحد

وفضلت ضحية هذا الوحش الكاسر ......الملل

لا أعلم ما الذي جذبني لحب رفعت إسماعيل ورواياته ربما لأن له نفس الأصول الشرقاوية التي لي .... والدم بيحن طبعا

المهم نفس الشعور الذي ينتابني بعد قراءة الروايات كل مرة

ملللللللللللللل

ولا أدري أهي مصادفة أم أمر آخر هو أمر آخر في الحقيقة حصل اليوم دفعني لهذا الشعور .....نفس ذات الشعور بالكآبة

والشعور بمدى ضآلتي وأني تافهة ولا أسوى شيئا في هذا الكون وهذه الحياة لم أكمل بعد اللستة التي بدأتها ....ترى أين كنت وصلت؟؟؟؟؟؟

تقريبا جمعت تلات أسماء بس فاضل سبعة يااااااااه

المهم يارب الحق اخلصها قبل.......ما

المهم نرجع لنفس القزازة التي اتحشرت فيها ازازة الملل ولنفس الموقف اللي بقى بيتكرر كتير اليومين دول ومش عارفة ليه مش قادرة اقتنع ان مش كل الناس زي بعضها وان فيه اختلااااااااااااافات مهوووووولة بين الناس وبعضها

على رأي وحدة أعرفها:هناك فرق والفرق واضح؟؟؟!؟!؟!؟

مع إني عارفة دا ومقتنعة بيه تماما ......بس زي مايكون مش عارفة والله!!!!!؟

ان شاء الله ف يوم م الأيام هتوصل لهذه الحقيقة يارب بس ميكونش بالطريقة الصعبة

وساعتها يمكن ينتهي شعوووووور الملل والقرف اللي انا حاسة بيه

والسلاااااااااااااااام ختااااااااااااااااام

الفارس بتاع الاحلام...!!.!.!؟

في قصص الأميرات تجده دائما يصل في نهاية القصة لينقذ الأميرة أو يوقظها من نومها بقبلة رقيقة أو يقتل الوحش الشرير من أجل خاطر عيونها
ودائما تعيش الأميرة معه في تبات وبنات ......وأينعم أحنا مبنشفش الصبيان والبنات بس هما قالولنا انهما جابوهم
ماعلينا....!!؟
المهم كنت دائما أفكر لو نزلنا الشارع اليوم وسألنا البنات والشباب ماهي مواصفات فارس أحلامك وماهي مواصفات فتاة أحلامك
(الفارس للبنات والفتاة للولاد عشان محدش يتلخبط بس...) المهم ياترا هتكون الإجابة إيه
وبما إني وحدة فاضية ومش قعدة ف مصر حاليا فده يخليني اتخيل الاجابات من غير ما اسمعها
المهم البنات غالبا الرد هيكون: يكون طويل وشبه أحمد عز......ميكونش بخيل....يكون حنين وبيفهم المرأة ويحترمها.....يكون بيقدر المرأة ويحترم جوانبها العاطفيه(محدش يسأل يعني ايه لاني سمعت الكلمة دي زي ماهيا كده ف برنامج)........يكون ملتزم!!!؟
أوبا .....حلوة الأخرانية دي والله بس مش كتير هيقولوها انا عارفة
الولاد بقى : تكون تعرف تحافظ على بيتها وجوزها......تخلي بالها مني.......تكون حلوة ومفيش مانع يكون فيها من نانسي عجرم........تكون ذكية ......تكون........معرفش ايه
المهم الاجابات هتختلف
الفكرة بقى ياترا كل واحد بيتمنى إنسان بمواصفات معينة بيرتبط ف الآخر بإنسان بنفس المواصفات دي؟؟؟؟!؟؟
مش عارفة بحس ان الحكاية دايما بتجيلو بالعكس يعني اللي نفسها تجوز واحد طويل بتتجوز ف الأخر واحد .......(طويل بس مش أوي....هههههههه) واللي نفسو يتجوز وحدة حلوة بياخد وحدة (حلوة برضو بس مش أوي عشان محدش يزعل)
ليه معرفش يمكن لان صعب نتحكم ف الشكل والمواصفات الخارجية لان اللي جوا هوا الاهم
الكارثة بقى لو لقيت واحد كده عندو مبادئ ونخوة ورجولة وشهامة......و........ وتسألو يقولك آه طبعا عاوزها ملتزمة
وتيجي تبص على خطيبتو دي تلاقي (الحمد لله الذي عافانا) ودا لان الالتزام اليومين دول بقى مصطلح مطاط كل واحد بيمطو على قد ماهوا عايز
المهم مش هندخل ف موضوع ز يدا المهم ان الايام احيانا بتخلي الواحد يضحك على نفسو لما يقعد ويفتكر ايام زمااااااااااااان والله على زمان وكان بيفكر ازاي وكان عايز ايه وخد ايه م اللي هوا كان عايزو.......؟؟!؟!؟!؟
عشان كده الحمد لله أنا مش حاطة أي مواصفات لفارس الاحلام لسببين
أولا لأني حاسة أنو مش هييجي أساسا....... الظاهر الحصان بتاعو بعافية حبتين.....؟!؟!؟؟ ههههههههه
ثانيا لإني مبحبش اتصدم واقتباسا من شعبان عبد الرحيم ......سايبها زي ماتيجي ......مفيش احسن من كده
والسلاااااااااااااااااااام ختاااااااااااااااااااااام

سبيييييييييييس توووووووووووون .......قناة شباب المستقبل

صفحة جديدة اكتبها هذه المرة وانا استمع إلى القناة العظيمة الباقية مابقي التلفاز
قناة شباب المستقبل سبيييييييييييييس تووووووووووووووون
حاولت مرارا أن أفهم سر إعجاب الأطفال بهذه القناة الغريبة عبثا وكأنه سر غريب كلعنة الفراعنة خير له أن يبقى دفينا
ما المتعة في مشاهدة عربات تجري بطريقى لا نفهمها والأطفال يلهثون خلفها صائحين:انطلقي ياماجنم
وما الممتع في مشاهدة هياتشو موري ودايهاتسو سوزوكا...؟؟!؟
المهم أنا طبعا احترم كل وجهات النظر المختلفة وأن كل واحد حر ما لم يضر تكمن المشكلة إذا حين يظهر الضرر
كيف تنفق مئات الريالات أو الجنيهات أو أيا كانت عملتك المحلية لشراء اللعبة القديمة التي كنا نلعب بها –أيام ابتدائي-:اليويو
باعتبار ان هذا بي بليد أو منا عارفة اسمو إيه....؟؟!؟؟!
المهم أننا أمام حقيقة لا مفر منها هي أن هذه القناة تحتل ركنا كبيرا في عقل الأطفال الفارغ ليكمل بقية ذلك الحيز البلاي ستايشن ولكن هذا موضوع آخر
أنا نفسي بدأت اهتم بها في فترة من الفترات وكنت أواظب على متابعة حلقات تيمون وبومبا ولا أعلم لماذا تيمون وبومبا تحديدا
ربما هو صوت هنيدي الساحر.....مبالغة يعني بس معلش بقى.....وربما الحاجات الغريبة اللي كانت بتحصل ف المسلسل
لا أعلم المهم أني فعلا وجدت نفسي أحب هذا التيمون وهذا البومبا ولا أجد خجلا في ذلك
وفي الحقيقة خجلي هذا لم يكن مبررا لاني أنا شخصيا بذات نفسي أعرف سيدات كبيرات ومتزوجات ولديهن أطفال....كمان....ولازلت تجدهن حين عرض توم وجيري يجلسن بشغف يتابعن الحلقات ....رغم إنها مكررة ومحفوظة...
ربما السر يكمن في النظرية العتيقة التي وضعها علماء النفس التي تقول إن بداخل كل إنسان طفل صغير يترك تأثيره على الإنسان في لمحة من اللمحات بطريقة دراماتيكية ترجع أصولها الى الأصول البرجوازية لنزعة التمشيط العرقية.........و.........
المهم الملخص يعني ان جوا كل واحد فينا طفل صغير....؟!؟؟!
هوا فين بقى الله أعلم .......بس الأكيد ان هوا اللي بيخلينا نحب نتفرج على توم وجيري......وتيمون وبومبا........وبكااااااااااااار......وماااااااااااازنجر و-الله يمسيكي بالخير ياللي ف بالي-
والسلاااااااااااااااام ختااااااااااااااااام

اللستة.....!؟

إنسان ايا انسان ما اجهلك
ماتفهك في الكون مااضألك
شمس وقمر وسدوم ملايين نجوم
وفاكرها ياموهوم مخلوقة لك....
وعجبي
عندما تستيقظ من نومك تشعر انك مجرد صندوق فارغ.....مجرد آلة كأي جهاز بُرمج ليؤدي عملا ما....
يكرره يوميا ....نفس العمل .....في نفس الوقت......
تسمع يميا نفس الكلام.....لا جديد......
عندما تشعر انك مجرد شئ.....كأي شئ....كهذه الصخرة فوق العشب .....مهملة لا جدوى منها
عندما تشعر انك زجاج .....لا يراك الناس بل يرون من خلالك...
عندما تشعر ان حياتك لم تكن بشئ ......لم تفعل شئ.....أو تترك شئ
لن يذكرك أحد ...... سوى سويعات قبل أن يواريك التراب وسويعات بعدها....وعندها
تكره حياتك ....ونفسك....وكل ما حولك
لا حول ولا قوة إلا بالله إيه الكآبة دي بس......بس هيا دي الحقيقة أنا احيانا كتير بحس بكده
بحس اني جيت الدنيا وهروح منها ومحدش هيفتكرني بعدها.......والحكاية دي مدايقاني أوي
معرفش ليه بس هيا مدايقاني
كان نفسي اعمل حاجة تخلي الناس تقول.....الله يرحمك ياندى والله
فكرت ف يوم ففكرة
ياترى بعد ما اموت كااااااااااااااااام واحد هيزهل عليا بجد؟؟؟؟؟
وعشان كده قررت اعمل لستة .....عشرة ع الأقل أنا مش عايزة أكتر من عشرة
عشر أشخاص .........مش من أهلي طبعا........... انا لحد دلوقتي جمعت تلاتة وفاضلي ستة
خصوصا ان فيه شروط معينة ف الاشخاص دول...
أن لا يقل عمر المتسابق عن 10 سنين.....أنو يكون عارفني بجد وهيزعل عليا بجد لما اموت
ويفتكرني ويدعيلي
مش عارفة يمكن لما أكمل اللستة دي أحس فعلا ان فيه حد هيفتكرني ف الدنيا دي بالخير
حتى لو مخترعتش اختراع عظيم ....أو اكتشفت اكتشاف خرافي
كنا زمان بنصبر نفسنا ع الحكاية دي ان احنا نقول : عادي ماهو نيوتن كان حمار ف المدرسة ولما وقعت على دماغو التفاحة
كان هربان م المدرسة-الله يمسيكي بالخير ياللي ف بالي-
وادينا اهو خلصنا مدارس ولا وقعت على دماغنا تفاحة ولا رمانة
يللا مين عارف بكره مخبي ايه
انا شخصيا لو هتسألوني نفسك تخترعي ايه؟؟
رغم ان محدش سأل بس انا برضو هجاوب
نفسي اخترع علاج لمرض السرطان
ودي حكاية تانية هبقى احكيها ان شاء الله
وطبعا دا عامل زي ماتسألو عيل صغير نفسك تطلع ايه؟؟ يقولك ظابط
يعني فكرة بريئةزي افكار الاطفال الصغيرين بس برضو وان لم اكتشف علاج للسرطان
نفسي ع الاقل اكمل
اللستة...؟؟؟!؟!؟!

الخيال......وصلة تعمل!!!؟

الخيال.......لا أعني هنا الظل بل الخياااااااااااااااااال
العالم الساحر الذي يعيش فيه كل من يرغب بنسيان واقعه .....مش شرط يكون واقعه دا مرير
أو طفولته كانت معذبة!!؟؟ انما الخيال ف حد ذاتو متعة للنفس ....وتقدر تقول تضييع وقت!!!!؟
من زماااااااااااان أوي مش فاكرة من أد أيه وانا عندي هوايات كتيييير منها العادي ومنها الغريب
مش عارفة اللي هكتب عن ودا يعتبر غريب ولا مش غريب ولا هوا خرف اصلا؟؟!؟!؟
لما دخلت كلية طب عرفت اني غالبا هيبقى مصيري زي ناس كتير بيقولو عليهم معقدين وباردين اسمهم الدكاترة
بس لما دخلت عرفت ان عشان تتخرج لازم تلغي حتة من شعورك والاه تفضل مخلل ف الكلية ان شاء الله
ايون ..... ليه بقى؟؟؟ تخيل معايا لو كل عيان هيدخلك بيموت هتزعل عليه وتقعد تعيط جنبو.... ولا كل وحدة بتولد هتحس بالمها
ولا كل اسرة هيموت لها شاب زي الورد ف عمليه هتصعب عليك؟؟؟ كده اخرتك هتكون الخانكة ان شاء الله
عشان كده لازم تتعامل باسلوب عملي بارد وتبقى اقتباسا من سعاد حسني....ولا جراح بريطاني.....
المهم بعد ما عرفت المعلومة القيمة دي قررت انو : لأههههههههههههه................لأأأأأهههههههههههههه
انا مشهبقى كده انا لازم افضل زي منا .....عشان كده فضلت برضو ف حتة الخيال بتاعتي دي
مش عارفة بعد كام سنة لما اقرا الكلام دا هعيط ع الماضي الاليم ان شاء الله ولا هدحك لاني طلعت جدعة ووفضلت ز يمانا الله اعلم
ما علينا المهم...... لما دخلت الكليه كان لازم اجيب جمجمة.....او كما يطلق عليها الفرنجة...سكل..... والحمد لله وفقني ربنا وشحت جمجمة وكانت قصة شحت الجمجمة دي حدونة لوحدها ابقى احكيها ف موضوع اخر
المهم.....بقيت لما اجي اطلعها م الكيس اقعد اب صلها.....واسال نفسي يا ترا دي كان اسمها ايه وهيا عايشة؟؟؟
هيا طبعا كانت ست او بنت....فيميل يعني.....وده سهل يتعرف من العلامات التشريحية ودا الليخلاني اطلق عليها اسم عزيزة
وكنت بتخيل عزيزة دي انها فلاحة من قرى بنها......واوعى حد يسألني اشمعنى بنها.......اتخيل شكلها بالجلابية ومعرفش ليه دايما لونها كان اخضر...مش عزيزة الجلابية.....وانها شعرها اسود لافة عليه طرحة خفيفية .....وان عزيزة دي وهيا عندها تمنتاشر تسعتاشر سنة كده جالها مرض خطير .....نقول سرطان...... سافرت طبعا القصر العيني ف مصر والحكاية بقى الباقية معروفة
كورسات علاج كيماوي و.....ادوية.......لغاية ما .......ماتت عزيزة!؟!!
وها انا ازاكر على جمجمة عزيزة.......
معلش ايها القارئ العزيز انا عارفة انك اصبت بالصداع من هذه الحكاية المملة التي لا اسا لها من الصحة سوى في خيالي المريض
بس عارف ايها القارئ العزيز ..... انا نفسي مش عارفة انهو الاسهل انك تتعامل مع الحاجات دي على انها مجرد شئ ولا انك تقدر انها ف يوم م اللايام كانت بني ادم من لحم ودم؟؟؟؟!؟!؟!؟!
زي ف المشرحة الناس دول اللي بنفصصهم ......ياترى كان اسمهم ايه....ومنين ف مصر......وايه اللي جابهم هنا؟؟؟؟
معلش بقى .....انا اصلي وحدة فاضية......نفسي بس الخيال يفضل ف حياتي ......وصلة تعمل!!!!؟؟

جاهين....الله يرحمك ياابو صلاح

حاسب على الأحزان وحاسب لها
وحاسب على رقابيك من حبلها
رح تنتهي لابد رح تنتهي
مش انتهت احزان كتير قبلها؟؟؟
وعجبي
اقتباسا من الأخت روبي....مش عارفة أرد واقولك ايه؟؟
لا تعليق
بعد ما اسمع احدى رباعيات جاهين تنتابني حالة لا استطيع وصفها...ليست نوبة صرع لا سمح الله
لاكن........ز
انا اعز الذكاء أوي .....ورباعيات جاهين دي تمثيل للذكاء في كلمات
ازاي تقدر تحكي حكاية ف سطر .....لا والحكاية دي ممكن تطلع منها بحكمة
احببت جاهين حتى كرهه الآخرون من شدة حبي له...لاني صرت اقول الرباعيات –في الرايحة والجاية-
لغاية ما زهقت الناس من الرباعيات واللي كتب الرباعيات-والله يمسيكي بالخير ياللي ف بالي-؟؟!؟!!؟!؟
القارئ العزيز لاحظ اني قلت لما بسمع الرباعيات ودا لاني مش بقراها ....لا بسمعها
لما اقرا الرباعيات اسمعها بالصوت ...صوت عمرو واكد... معرفش ليه يمكن لان اول ما عرفت الرباعيات دي كان ف فلم ديل السمكةبتاع عمرو واكد كان هوا بيحب جاهين ودايما يقرا الرباعيات بتاعتو
او اقراها انا بصوت عالي عشان احس بيها..... معرفش ليه برضو
مع ان كتير منها فيه حاجات انا مش موافقة عليها الفاظ.....افكار .......كلام
لكن انا نفسي معرفش ليه بحب الرباعيات اوي كده ومن كتر حبي للرباعيات حاولت اني اكتب زيها
ملحوظة للقارئ العزيز: الرباعية اللي فوق تحت عنوان المدونة دي بتاعتي!!!؟؟!!
مين عارف يمكن ف يوم م الايام تبقى ماشي ف امانة الله ....تلاقي ع الرصيف كتاب رباعيات ندى كمال
مييييييييييييين عارف؟؟؟؟؟؟؟؟
والسلاااااااااااااااااااااااااام ختاااااااااااااااااااااام

الطيبة ......وصلة لا تعمل

ف حياة كل واحد أسرار دفينة دفنها من زمان ......وزمنها تحللت
حاجات مينفعش انو يقول لأي حد عليها...أي حد مهما كان
ليه بقى؟ معرفش بس جرت العادة إنك لو قلت بحت لحد بأسرارك ياخد دي نقطة عليك
ويفضل شايلهالك لغاية هوووووب ما تقع الفاس ف الراس وتتخانقو مثلا
يقوم كاشف السر الدفين ويعيده من المقابر.....
انا لان عندي مشكلة ثقة ف الناس....مش بسهولة بطلع الأسرار من الترب
خلي الراقدون تحت التراب...... تحت التراب ......لإني طبعا ياما خدت مقالب
مش عارفة ليه دايما عندي نزعة اني اقول يااه شوف زمان كان الناس عاملين ازاي وشوف دلوقتي...
مع اني اساسا مشفتش زمان بس أي انسان بيبقى عندو مثال للمدينة الفاضلة ف عقلو بيتخيل انها لو كانت موجودة كان هيبقى إشطة!؟
اهو المثال دا بيتجسد عندي ف الناس زمان ..........عموما دا استطراد لا داعي له
انا بتهيألي ان مع مرور الزمن، الناس بتزيد سوء ....والشر بيملا النفوس أكتر

يمكن هما بيحسوش بكده
ولا اللي بيتعامل معاهم بيحس بكده .....ميحسش بده إلا واحد قاعد فاضي ومراقب تعاملات الناس ما وراهوش شغلة ولا عملة غير انو يتفرج
(طبعا دي كناية استعارية بطريقة أيديلوجية ليبرالية عشان أقول زيي أنا)
وعلى اعتبار اني بسافر كتير ونص عمري قضيتو ف المواصلات فاحلى حاجة انك تسمع حوارات الناس ف الأتوبيس
ناس كتير كانو بيقولو عليهم زمان(بسطاء طيبين) اسمع بقى ايها القارئ العزيز:
احنا لسه مطلعناش م الاسمعلية مثلا تلاقى واحد بيتصل بصاحبو :المكالمة:
( الواحد اللي معرفهوش: خير في ايه؟؟
اللي ع الخط معاه:@$%##@@؟
الواحد اللي معرفهوش: لا انا داخل ميت غمر اهو)
تنط انتى ع الشباك متخيل ان المحطة بتاعتك عدت وانتى نايم تفاجأ انك لسه ف الاسماعلية وانها كذبة أخرى من كذبات الناس (الطيبين البسطاء)
واحد تاني: بيكلم-مراتو اتضح فيما بعد-
الواحد التاني: انتى قافلة موبايلك ليه ياهانم؟؟؟؟
الهانم: $#%%$#!@!@؟
الواحد التاني: يعني افرض عوزتك مثلا افرض مصيبة حصلت على دماغك ياشيخة
الهانم قفلت السكة ف وشو
عادي عادي (الطيبين البسطاء ) برضو
طيب بلاش ف الاتوبيس انزل برا خناقة ف الشارع بين سواقين حصل حاجة هايفة فوقفوا بسببها الطريق
كل مايمكنك أن تسمعه هو :@#$$$##@@#$$$%$##@@@#$؟
على اعتبار ان هذا سباب وشتائم بالاب والام وهو ما صار سمة واضحة ف كلام الناس ( الطيبين البسطاء)
اه ..... بص شوف على وضع الناس الطيبين البسطاء ف الخارج (خارج البلاد)مفيش داعي اتكلم بيعملو ايه
بيعملو ايه فبعض على وجه الخصوص ليه معرفش؟؟؟
عشان ممكن اعيط
الطيبة في هذا الزمن....... أصبحت وصلة لا تعمل

الحب .....وصلة لا تعمل

لا اعلم لماذا يكون السياسة والحب موضوعين خصبين للمناقشة ف المدونات
الكل ياإما بيحب على نفسو.......ياإما مش طايق البلد وعايز يهج
وعلى اعتبار ان انا حاليا مش ف البلد فمقدرش اتكلم عنها بالسوء
ومعرفش ايه سر الارتباط الوثيق دا بين الاتنين من أيااااااااااااااام أنطونيو وكيلوبطة!!؟
الحب دائما ممزوج بالسياسة.... هذا هو القانون الذي لا نستطيع تغييره
حتى الكلام عنه يجب أن يكون ممزوج بالسياسة يجب أن تدارى وتوارب ولا تفصح عن كل المكنونات
هذا إن كنت عاشق.........ز
وما إن تنفتح السيرة حتى يتبادر إلى الذهن إيه....مزيكا هااااااااااااادية (زي اللي بسمعها دلوقتي)وشمووووووع
وصوت بيانو ناعم ووردة حمرااااااااا
أيون......لااااااا دا كان زمان
دلوقتي أي حاجة بالمنظر دا إعرف أنها لعب عيال وكلام فاضي وملهاش نهاية
خالص.... الكلام دا كان ينفع أيام ...بتحبني ياحسين؟!؟! أمال .....حسييييييييين...... أمااااااااااال
معرفش ليه دايما البطل كان حسين وأمال أو أحمد ومنى))
المهم دا كان أيام زمان دلوقتي كل حاجة ااتغيرت حتى المشاعر بقت باردة زي الجيلاتي
كان زمان ممكن تلاقي اتنين يفضلو متجوزين 15 قول عشرين سنة
دلوقتي لو شفت دا...... بلغ عنهم زاهي حواس يضمهم لهيئة الأثار النادرة!!؟
ودا مش غريب لإن حياة الناس بقى فيها حجات كتير غايبة ومفقودة(وصلات لا تعمل) الحب منها
لو مكنش اتنين واقفين ف زاوية بيتوشوشو....ومسدات الساعة تلاتة الفجر.....ومكالمات من ورا بابي ومامي
ميبقاش حب
تعالى اتفرج عليهم بعد الجواز.......اتأخرت ليه؟؟؟ أنا حر ياستي!!!! لا مش حر ولما أكلمك ترد عليا
ووحي هذا الموضوع خناقة في الأوساط العائلية بين بنت معرفش مين وابن معرفش مين كده والتي أراهن بمليون جنية
أن بيتا من البيوت المصرية لا يخلو منها
المشكلة أن هذين الاثنين هما اتنين شباب زي الفل

(ضحيتي (قصدي بطلي) قصة حب عنيفة قبل الزواج
تعالا اتفرج عليهم دلوقتي.........
اللي نفسي افهمو ......بتروح فين المزيكا الهااااااااااااادية .....وصوت البيانو الرقيق......والورد الأحمر
بعد الجواز
وإيه العفاريت اللي بقت مالية البيوت دي.....
الحب في هذا الزمن....... بقى وصلة لا تعمل

أو ع الأقل بتعمل بس مش أوي

والسلاااااااام ختاااااااااااام

بنج....بونج

تستيقظ كل يوم يملؤك ذلك الشغف اللذيذ لتعلم شئ جديد
قررت ان اشبع ذلك الشغف اليوم....... بتعلم البنج بونج
تنس الطاولة هي لعبة يرجع أصلها إلى ......لا ليس اليوم موعد درس التاريخ!
يكفي انني أرغب في تعلم هذه اللعبة خصوصا انه توفر لي كل المقومات الأيدلوجية لتعلم اللعبة...!؟
لدي المضارب والكرة والطاولة وحتى الشخص الذي يعلمني فقد تطوع أخي لتعليم اللعبة
المهم شمرت عن ساعدي وبسم الله الله أكبر بسم الله...بسم الله
لم يكن الوقت مشكلة فنحن في اجازة عطلة مفتوحة لا يوجد فيها شئ اكثر من الوقت
فأين تكمن إذن المشكلة الوحيدة.....أها......طبعا تكمن في قدراتي الخارقة...!!!
تذكرت عندها يوم أردت تعلم الغطس في شرم الشيخ (مع إني مبعرفش أعوم أساسا)
وبدأت الكارثة.....
أنا لا أتقن حتى مسك المضرب ....ناهيك عن الإرسال .....ياللهول ما هذا الاختراع العجيب
عليك أن تبدأ بإرسال الكرة ولا أدري لماذا كنت أتطوع أنا بإرسال الكرة كل مرة؟!!
الكرة بلونها البرتقالي أعتقد أنه كاد في آخر المباراة أن يتحول إلى الأحمر من الحنق..!!
ولو تم تصوير المباراة بالفيديو لعرضت تحت عنوان ;( لا تجربوه في منازلكم)
اقتنعت اخيرا بإني أخليني ف الطب واسيبني من الرياضة والكلام دا )حيث ان منتهى علاقتي بالرياضة
الفرجة على الماتشات والتشجيع........وبس!
انتهت المباراة بسقوط الكرة خلف الثلاجة ومعركة حامية لاستخراجها من الأعماق..!!
وتذكرت عندها نكتة قديمةعن (اتنين صعايدة بيلعبو شطرنج الملك ولع ف نفسو..!!!)مع الاحترام الكامل لذوي الأصول السوهاجية والأسيوطية..!!

حاجات ....؟!؟؟؟!؟!؟

حاجات كتير ف الدنيا دي بتلخبط ,,,,,, حاجات مبنشوفهاش لانها مش موجودة
وحاجات منشوفهاش لانها موجودة
طب الاولانية ماشي التانية بقى.......؟؟؟؟
حاجات بتبقى قدامنا كل يوم ومن كتر ماهيا بتتشاف وخدنا عليها منحسش بيها ونوصل ف لحظة ان انا معدناش نشوفها
الا لو فيوم فقدناها!!!!!
خد عندك مثلا الزبالين ف الشارع......انا احترم الناس دول جدا لان من غيرهم تخيل الوضع هيبقى عامل ازاي؟؟؟؟
كام مرة عديت على زبال وخدت بالك منو بقى؟؟؟؟؟ لابس ايه؟ شكلو ايه؟؟؟وشو ؟؟؟ملامحو؟؟؟؟
طبعا قليل جدا........
لكن لو ف يوم اختفى كل الزبالين اللي ف الشارع وفضل واحد بس أكيد طبعا هتحفظ شكلو وملامحة وممكن ترسمها غيبي كمان
وحاجات تانية منشوفهاش لاننا منقدرش نشوفها والاحسن لينا ان احنا منشوفهاش(اللهم اجعل كلامي خفيف عليهم)
واكيد كلنا عارفين الحاجات اللي مبنشوفهاش لاننا =مش عايزين= نشوفها....؟؟؟؟
سألت مرة واحد عندو بتاع ستين سبعين-المهم انو عجوز-سألتو أخبار النظر عندك إيه ياحاج؟؟؟؟
قاللي:أهو الحاجة الحلوة أشوفها والوحشة مبشوفهاش!!!!!
وعادي اهو عايش الحمد لله ومبسوط شاف......مشافش .......اهي الدنيا ماشية
السؤال بقى ايه اللي يحصل لو القوانين الكونية(حلوة القوانين الكونية دي) ايه اللي يحصل لو القوانين دي اتغيرت؟؟؟؟
لو الحاجات اللي المفروض ان احنا منشوفهاش دي بقينا نشوفها......؟؟؟؟
لو مثلا كنت واقف قدام واحد وبتسألو: إيه ياعم أنتا اتأخرت ليه؟انا مستنيك بقالي ساعة
شفت خير اللهم اجعلو خير...(.قرينو ) بيوسوسلو يكدب عليك !!!!!!
بسم الله الرحمن الرحيم دا ايه الرعب دا؟؟؟؟؟من بكرة هبطل اتفرج على الخرف اللي بتفرج عليه
لااااا لاااااا خلي الحكاية كده أحسن اللي نشوفو نشوفو.......
واللي منشوفهوش منشوفهوش.........
ويلللا أدينا عايشين
والسلااااااااااااااام ختاااااااااااااااااام

صحيت ف يوم.....وقررت اكتب

بسم الله..

أنامتعودتش خاااااالص اكتب عن نفسي
أنا بكتب من زماااااااان لدرجة اني مش فاكرة من امتى بالظبط
كتبت كل حاجة:كتبت شعرباللغة العربية،والعامية المصرية،والعامية الخليجية
وكتبت قصص قصيرة وكتبت كل حاجة الا المذكرات .......عمري ما فكرت اكتب مذكرات
كنت بحس انك عشان تكتب مذكرات لازم يكون عندك حاجة مهمة اوي تقولها،،أو تكون فاضي أوي مش لاقيلك شغلانة (على أساس اني كنت ببقى هموت من كتر الشغل) يللا ماعلينا المهم
بس الحقيقة مش كده خالص....
انا لقيت انك تكتب (سواء عندك حاجة مهمة أو معندكش)سواء حد هيقرا أو مش هيقرا
دا فحد ذاتو متعة........
ولاني بحب الكتابة على لوحة المفاتيح اكتر من القلم(خصوصا ان خطي مش أد كده)
فحكاية المدونات دي ملت دماغي أوي
وصحيت كده ف يوم وقررت : أنا هعمل مدونة
آه ومالو بس مين هيقرا؟؟؟؟؟
مش مهم مين هيقرا .......المهم اني اكتب........ لاني لو مكتبتش دماغي هتصدي زي القفل المركون بالظبط
(عذرا بقى للتشبيه)
المهم طب اسمي المدونة ايه؟...... اسمي المدونة ايه؟.......و
أنا عايزة اسم كده معبر ، ولأن ليا خبرة شوية يعني مش كتير ف موضوع المدونات والمنتديات والحاجات دي
ف انا عارفة ان اسماء المدونات هيا اللي بتشد الواحد اننو يدخلها قبل ما يعرف هيا بتتكلم عن ايه-ودا لإنها غالبا مبتتكلمش عن حاجة معينة-
الإسم اللي اخترتو يمكن ميكونش جذاب وساحر .......احممم معلش بقى
لكنو بيعبر عن كل اللي بحس بيه انو فيه حاجات كتير في حياتنا بقت وصلة لا تعمل
على فكرة وصلة لا تعمل دي بيكتبهالك الكمبيوتر لما تدوس على لينك غلط أو مش شغال تلاقيه راح كاتبلك
(الوصلة لا تعمل).... عشان نبقى على نفس الصفحة بس
المهم.... فايه حكاية الوصلة التي لا تعمل دي
لاااااااااااااااااااااا دا موضوع رسالة تانية
والسلام ختاااااااااااااااااااااام

اهلا بيك اهلا بيك ........ف مدونتي انا بحييك

بسم الله الرحمن الرحيم

صلو ع النبي...........ء

عليه الصلاة والسلام

ف يوم من ذات الأيام قررت أن انشئ مدونة

وفي نفس ذات اليوم قررت إني أعذب الناس وأدعوهم لقراءتها

فإذا كنت تقرأ هذه الكلمات الآن فاعلم أنك واحد من هؤلاء المعذبين

)معلش بقى(

المهم .....لماذا انشأت المدونة ولماذا سميتها وصلة لا تعمل و....و......و

لااااااااا هذا في رسالة قادمة هذه فقط

رسالة ترحيب

بس خلاص

والسلاااااااااام ختااااااااااااااااام